«70 ёшимга спа-салонга боришни эмас, тез ёрдам машинаси келишини хоҳлагандим»
Кенилвортлик Шерон Макстед тиббий буюмлар билан тўлдирилган тез ёрдам машинасини Украинага ҳайдаб бормоқда.
«Мен 70 ёшимга спа-салонга боришни эмас, тез ёрдам машинасини хоҳлаган эдим»
Шэрон тез ёрдам машинасини инсонпарварлик ёрдами билан бирга Украина яқинида қолдиради ва уйига учиб қайтади
Кенилвортлик аёл 70 ёшли туғилган кунига тез ёрдам машинаси совға қилинганида, унинг орзуси ушалганини айтди.
Шэрон Макстед заргарлик буюмлари ёки спа-салонда дам олиш ўрнига, июнь ойида 70 ёшга тўлишини «ўзига хос тарзда» нишонлашни хоҳлаганини айтди. Энди у турмуш ўртоғи Дэвид билан бирга тиббий буюмлар, иссиқ кийимлар ва ногиронлар аравачаси юкланган тез ёрдам машинасини Украинага ҳайдаб боради.
Эр-хотин жума куни йўлга чиқиб, Польша шарқига боришади ва у ерда тез ёрдам машинаси ҳамда ундаги юкларни қолдириб, уйга самолётда қайтишади.
«Турмуш ўртоғим агар машинани ўзим ҳайдашга рози бўлсамгина уни сотиб олишини айтди. Бу мен учун кутилмаган янгилик бўлди ва бироз хавотирдаман, чунки беш йилдан бери автомат узатмали машина ҳайдаётган эдик», деди Шэрон.
«Мен 1970 йилларнинг 17 соатлик мусиқасини юклаб олдим ва йўлда Queen гуруҳининг "Дон'т Стоп Ме Нов" қўшиғига жўр бўлиб кетаман», дея қўшимча қилди у.
Бу режа унинг турмуш ўртоғи Дэвиднинг «Kenilworth Lions» ташкилотидаги фаолияти орқали амалга ошди. Ушбу ташкилот Лимингтон шаҳрида жойлашган «Belvedere» хайрия жамғармаси билан ҳамкорлик қилиб, Украинадаги урушдан жабр кўрган одамларга инсонпарварлик ёрдами, жумладан, тез ёрдам машиналари, тиббий асбоб-ускуналар ва дори-дармонлар етказиб беради.
Шэрон турмуш ўртоғи Дэвид билан бирга Европа бўйлаб Украинага қараб йўл олади.
Бунгача Украинага тез ёрдам машинасида тиббий буюмлар етказиб бериш учун икки марта борган Дэвид бу сафарлар «ҳар доим жуда фойдали» бўлганини айтди.
Шэрон уруш бошланганидан бери хайрия ташкилоти томонидан Украинага юборилаётган 70-тез ёрдам машинасини ҳайдаб боради.
У BBC CWR телеканалига берган интервьюсида машинани Европа бўйлаб ҳайдашдан бироз хавотирда эканини, бироқ турмуш ўртоғи йўлнинг катта қисми автомагистралдан иборат бўлишини айтиб, уни тинчлантирганини билдирди.
Шэрон Украинага олиб кетаётган хайрия кийимларининг кўплигидан «кўзларига ёш келганини» айтди.
Шэроннинг сўзларига кўра, у тез ёрдам машинасида олиб кетиш учун «Kenilworth Lions» ташкилотидан ва ўзи аъзо бўлган, хотин-қизлар ҳаётини яхшилашни мақсад қилган «Soroptimist International of Kenilworth and District» феминистик гуруҳидан кўплаб кийим-кечак хайрияларини қабул қилиб олган.
«Одамларнинг нақадар саховатли эканидан баъзида кўзларимга ёш келди, ҳатто деярли кийилмаган кийимларни ҳам беришди — одамларнинг қилган ёрдами кишини ҳайратда қолдиради».
Уларнинг қизи Клэр ота-онасининг «ўз жамиятларига шунчалик кўп ёрдам бераётгани ва одамлар ҳаётини яхши томонга ўзгартиришга ҳисса қўшаётганидан жуда фахрланишини» айтди.
«Келгуси йили тўйимизнинг 50 йиллиги, шунинг учун ўшанда қандай шўхлик қилишимизни ким билади дейсиз», деди Шэрон.