2035-йилгача қайси муҳандисларга талаб энг кўп ошади?
АҚШда 2025–2035-йилларда муҳандислик соҳасидаги иш ўринлари сони 8 фоизга кўпайиши прогноз қилинмоқда. Энг юқори ўсиш саноат муҳандислигида кутиляпти: бу йўналишда бандлик 12 фоизга ёки қарийб 45,4 минг иш ўрнига ошиши мумкин.
2035-йилгача қайси муҳандисларга талаб энг кўп ошади?
АҚШ Меҳнат статистикаси бюроси ҳисоб-китобларига кўра, шу даврда мамлакатдаги умумий бандлик 3,5 фоизга ўсади. Шунга кўра, муҳандислик соҳасидаги ўсиш суръати умумий кўрсаткичдан икки баробардан ҳам юқори бўлиши кутилмоқда.
Сунъий интеллектнинг меҳнат бозорига таъсири кенг муҳокама қилинаётган бир вақтда, прогнозлар бир қатор муҳандислик йўналишларида иш ўринлари ортишини кўрсатмоқда.
Иш ўринлари энг тез кўпайиши кутилаётган муҳандислик йўналишлари:
Саноат муҳандислиги - 12 фоиз;
Механика муҳандислиги - 11 фоиз;
Электр муҳандислиги - 10 фоиз;
Компютер ускуналари муҳандислиги - 9 фоиз;
Аерокосмик муҳандислик - 8 фоиз;
Биоинженерия - 8 фоиз;
Материаллар муҳандислиги - 8 фоиз;
Қишлоқ хўжалиги муҳандислиги - 7 фоиз;
Қурилиш муҳандислиги - 6 фоиз.
Бироқ фоиздаги юқори ўсиш ҳар доим ҳам кўпроқ янги иш ўрни яратилишини англатмайди. Натижа муайян соҳада ҳозир қанча мутахассис ишлаётганига ҳам боғлиқ.
Масалан, қурилиш муҳандислигидаги 6 фоизлик ўсиш тахминан 24,5 мингта янги иш ўрнига тенг. Қишлоқ хўжалиги муҳандислигида эса ўсиш 7 фоиз бўлиши кутилса-да, бу атиги 100 та қўшимча иш ўрнини англатади.
Умумий меҳнат бозорида энг тез ўсадиган йўналишлардан бири соғлиқни сақлашдаги ёрдамчи хизматлар бўлиши прогноз қилинган. Бу соҳада бандлик 13,3 фоизга кўпайиши кутилмоқда.
Келтирилган рақамлар АҚШ меҳнат бозорига оид прогнозлар бўлиб, 2025–2035-йилларда иш ўринлари сонининг соф ўсишини ифодалайди. Улар бошқа мамлакатлардаги талаб ёки муайян касб бўйича ишга жойлашиш кафолатини англатмайди.