Öзбекистон элçилари хориждаги меҳнат мигрантлари ҳуқуқларини ҳимоя қилади
Президент Şавкат Мирзиёев элçиларга хорижда иşлаётган öзбекистонликларнинг ҳуқуқларини ҳимоя қилиş ва муаммоларини ҳал этиşда şахсан ёрдам бериşни топşирди.
Ўзбекистон элчилари хориждаги меҳнат мигрантлари ҳуқуқларини ҳимоя қилади
Ўзбекистон элчилари хорижда ишлаётган фуқароларнинг ҳуқуқларини ҳимоя қилиш ва улар дуч келаётган муаммоларни бартараф этишда ёрдам бериш билан бевосита шуғулланади. Президент Шавкат Мирзиёев 2 ноябр куни меҳнат миграцияси масалаларига бағишланган йиғилишда тегишли вазифаларни белгилаб берди.
Ёрдам сўраш механизмларидан бири «Онлайн маҳалла» платформаси бўлади. Хорижда оғир вазиятга тушиб қолган ватандошлар ушбу тизим орқали ўз муаммолари ҳақида хабар беришлари мумкин. Зарур ҳолларда Ўзбекистоннинг улар бўлиб турган мамлакатдаги элчиси муаммони ҳал этиш жараёнига шахсан қўшилади.
Президент хорижда меҳнат қилаётган фуқаролар ҳуқуқларини ҳимоя қилиш давлатнинг доимий вазифаси бўлиб қолиши кераклигини таъкидлади.
«Хорижда ишлаётган барча ватандошларимиз — оиласини боқиш, фарзандларининг келажагини таъминлаш учун тинмай меҳнат қилаётган ҳақиқий жасур инсонлар», — деди Мирзиёев.
Ҳокимлар зиммасига ҳам меҳнат мигрантларининг оилалари ва ота-оналарини қўллаб-қувватлаш, шунингдек, уларнинг фарзандларига сифатли таълим олиш учун шароит яратиш масъулияти юклатилади. Улар дипломатлар билан биргаликда фуқароларнинг хорижда ишга жойлашишига кўмаклашиш ва янги шароитларга мослашиши билан шуғулланади.
«Хорижда ишлаётган бирорта ҳам ватандошимиз ўз муаммолари билан ёлғиз қолмаслиги керак», — деди давлат раҳбари.
Йиғилишда 30 ноябрдан 5 декабрга қадар Тошкентда ўтказилиши режалаштирилган «Янги Ўзбекистон — глобал имкониятлар чорраҳаси» форумига тайёргарлик масаласи ҳам муҳокама қилинди. Унда 52 та давлат вакиллари иштирок этиши кутилмоқда.
Мирзиёев тадбирдан янги экспорт йўналишларини очиш ҳамда Европа ва Яқин Шарқдаги иш берувчилар билан алоқалар ўрнатиш учун фойдаланишни топширди.
Ҳар бир элчи зиммасига форумда иштирок этиш учун 50–100 та йирик рекрутинг агентлиги ва импорт қилувчи компаниялар вакилларини жалб қилиш вазифаси қўйилди.