Ëш футболчиларни тайёрлаш бўйича дунёнинг энг яхши клублари эълон қилинди
Португалиянинг «Бенфика» клуби профессионал футболчиларни тарбияловчи энг яхши йирик марказ сифатидаги мақомини яна бир бор тасдиқлади.
Ёш футболчиларни тайёрлаш бўйича дунёнинг энг яхши клублари маълум қилинди
СИЕС эълон қилган тарбияловчи клубларнинг йиллик рейтингида Лиссабон шаҳри клуби 2025-йилдагидек 101,3 балл билан биринчи ўринни эгаллади.
СИЕС методологиясига кўра, клубларнинг ўрни ҳозирда уларнинг нечта тарбияланувчиси профессионал клубларнинг асосий жамоаларида ўйнаётганига қараб белгиланади (бунда жами 49 та мамлакат чемпионати ҳисобга олинади).
Шу билан бирга, клуб у ёки бу футболчини тарбиялаган деб ҳисобланиши учун ўйинчи 15 ёшдан 21 ёшгача бўлган даврда ушбу клубнинг асосий жамоасида камида уч мавсум ўтказган бўлиши керак. Қўшимча баллар академия битирувчиси ўйнаётган клуб даражаси, у қатнашган ўйинлар савияси, майдонда ўтказган вақти ҳамда ёшига қараб берилади (қанча ёш бўлса, шунча яхши).
Ушбу ҳисоблаш услубига кўра, «Бенфика» тарбияланувчилари сони 93 нафарни ташкил этди. Ҳозир улардан фақат тўрт нафари Лиссабон жамоасида ўйнамоқда. Яна 14 нафари «катта бешлик» (Англия, Испания, Германия, Италия, Франсия) чемпионатлари клубларида, қолганлари эса нисбатан оддийроқ жамоаларда тўп сурмоқда.
Эътиборлиси, иккинчи ва учинчи ўринларни эгаллаган Аргентинанинг «Ривер Плейт» ва «Бока Хуниорс» клубларида ҳисобга олиш қоидаларига мос келувчи тарбияланувчилар сони «Бенфика»никидан кўп ёки унга тенг: «Ривер Плейт»да 94 нафар, «Бока Хуниорс»да эса 93 нафар. Бироқ Аргентина грандлари академиялари битирувчилари топ-клубларда камроқ экани сабабли («катта бешлик» жамоаларида 10 нафардан футболчи), уларга камроқ — мос равишда 97,6 ва 96,7 балл берилди.