Лионел Месси Испания футбол клубини сотиб олди — Марса

Лионел Месси Испания футбол клубини сотиб олди — Марса

Саккиз карра “Олтин тўп” соҳиби бўлган аргентиналик ҳужумчи Лионел Месси Испаниянинг иккинчи дивизиони (Сегунда) вакили “Элденсе” футбол клубининг 100 фоиз аксиясини харид қилиш бўйича келишувга эришди.

Бу аргентиналик ҳужумчи учун 2026-йил давомида футбол клублари билан боғлиқ иккинчи харид бўлди. Аввалроқ у жорий йилнинг апрел ойида Барселона провинсиясининг Баш-Лёбрегат ҳудудида жойлашган Каталониянинг “Корнеля” клубини ҳам сотиб олган эди. Манбанинг қўшимча қилишича, Месси “Интер Маями”даги фаолиятини якунлагач, айнан “Элденсе” клуби базаси жойлашган Аликанте провинсиясининг Элда шаҳрида доимий яшашни режалаштирмоқда.

Маълумот учун, Месси 2023-йилдан бери АҚШнинг “Интер Маями” жамоаси шарафини ҳимоя қилиб келмоқда. У жамоаси билан 2025-йилда МЛС чемпионлигини қўлга киритган. 2025-йил октябр ойида аргентиналик юлдуз Америка клуби билан амалдаги шартномасини 2028-йил охиригача узайтирди.

Жорий йилнинг 31-август куни Месси Аргентина миллий терма жамоасидаги фаолиятини расман якунлаганини эълон қилди. Ҳужумчи фаолияти давомида бир қатор йирик ютуқларга эришган. У Аргентина терма жамоаси сафида 2022-йилги Жаҳон чемпионати ғолибига айланган, 2026-йилги мундиалда эса финалга қадар етиб борган. Шунингдек, футболчи 2008-йилги Олимпиада ўйинларининг олтин медали соҳиби, икки карра Америка Кубоги (2021 ва 2024-йиллар) ҳамда Финалиссима—2022 мусобақалари ғолиби ҳисобланади.

Ҳужумчи шахсий рекордлар борасида ҳам алоҳида натижаларни қайд этган. Хусусан, Месси мутлақ рекорд ўрнатган ҳолда 8 марта “Олтин тўп”ни қўлга киритган. Бундан ташқари, у 3 марта ФИФА талқини бўйича йилнинг энг яхши футболчиси деб топилган, Европа чемпионатларининг энг яхши тўпурари сифатида 6 марта “Олтин буца”га эга чиққан ҳамда 2 марта Жаҳон чемпионатининг “Олтин тўпи”га муносиб кўрилган.