Украинанинг АҚШдаги собиқ элчиси ноқонуний бойишда айбланди

Украинанинг АҚШдаги собиқ элчиси Олга Стефанишина ноқонуний бойлик орттиришда гумон қилинмоқда. Бу ҳақда Коррупсияга қарши курашиш маркази маълум қилди.

Олий аксилкоррупсия суди Стефанишинага нисбатан эҳтиёт чорасини белгилади. Ҳимоя томони суд мажлисини ёпиқ ўтказишни сўраган. “Украинская правда” журналисти Михаил Ткачтинг манбаларига кўра, тергов айнан ноқонуний бойлик орттириш ҳолати бўйича олиб борилмоқда. Стефанишинанинг ўзи вазиятга қуйидагича изоҳ берди:

“Ҳар қандай процессуал ҳаракатлар ҳуқуқни муҳофаза қилиш тизими фаолиятининг қонуний бир қисми бўлиб, бу ҳали айбнинг исботини англатмайди. Мен бу воқеаларга хотиржам ва ортиқча ҳиссиётларсиз муносабатдаман... ОАВда, хусусан, кўчмас мулк юзасидан пайдо бўлаётган саволларнинг аксариятига бир йилдан ошиқроқ вақт аввал очиқ ва анча батафсил изоҳ берганман”, деди у.

Дастлаб прокуратура Олга Стефанишинага нисбатан 13 миллион 100 минг гривна миқдорида гаров эҳтиёт чорасини қўллашни сўраган. Прокурор Стефанишинанинг топшириғига биноан бошқа шахслар мол-мулк сотиб олганини маълум қилган.

Хусусан, Стефанишина ўз декларациясида иккита бир хонали квартирани, уларни таъмирлашга, онасининг даволанишига, авиачипталарга ҳамда яна бир квартира ижарасига сарфланган нақд пулларни кўрсатмаган. Шунингдек, у қўл остидаги ходими номига расмийлаштирилган Мерседес автомобилидан фойдаланиб келганини ҳам декларацияга киритмаган. Суд натижада собиқ элчига 6 миллион гривна (134 минг доллардан ортиқ) миқдорида гаров пули белгилади.

“Менда бундай маблағ йўқ — на 13, на 10, на 6 миллион. Лекин албатта, гаров пулини бериш учун бу маблағни излайман”, дея муносабат билдирди Стефанишина суд қарорига.

У аввалроқ собиқ адлия вазири Олена Лукаш иштирокидаги иш бўйича ҳам гумонланувчи эди. Ўшанда у ва бошқа шахслар 2013–2014-йилларда Украина қонунчилигини Европа Иттифоқи стандартларига мувофиқлаштириш учун ажратилган маблағларни ўзлаштиришда айбланган. Ҳозирда ушбу иш Олий аксилкоррупсия судида кўриб чиқилмоқда.

Олга Стефанишина 2020-йилдан буён Европа интеграцияси бўйича бош вазир ўринбосари лавозимида ишлаб келган. 2025-йил август ойида у Украинанинг АҚШдаги элчиси этиб тайинланган эди. 2026-йил 3-август куни Украина президенти сайтида Стефанишинани элчи лавозимидан озод этиш тўғрисидаги фармон эълон қилинди. Элчининг ўзи эса “шахсий сабаблар” билан истеъфога чиққанини айтган.