Украина собиқ мудофаа вазири ишдан олингани сабабини очиқлади

Украинанинг собиқ мудофаа вазири Михаил Федоров ўзининг истеъфоси ортидаги ҳақиқий сабабларни “Украинская правда” нашрига берган интервюсида маълум қилди.

Федоровнинг таъкидлашича, унинг лавозимидан кетиши муайян шахслар ёки ташкилотлар билан келишмовчиликлар натижаси эмас. У 16-июл куни, истеъфога чиқишидан аввал, ўша пайтдаги Украина Қуролли кучлари бош қўмондони Александр Сирский билан зиддиятда бўлганини айтган эди. Истеъфога қарши бўлганлар бутун Украина бўйлаб намойишлар ўтказиб, Сирскийни лавозимидан четлатишни талаб қилишган. Шундан сўнг, 22-июл куни Сирский бош қўмондонлик лавозимини тарк этган.

Журналистларнинг ишдан бўшатилиш сабаблари ҳақидаги саволига жавоб берар экан, Федоров апрел ойидан бошлаб ўзига ва жамоасига нисбатан босимни ҳис қилганини айтди. У, масалан, ҳуқуқни муҳофаза қилувчи органларнинг фаоллиги ошганини қайд этди.

“Бу харидлар, тендерлар билан боғлиқ, айнан шу жараёнларни ислоҳ қилишни бошлаганимиз сабаб, ўйлайманки, кўпчиликда катта норозилик уйғотди”, деди у.

Федоров Мудофаа вазирлигидаги муаммоларга алоқадор шахслар, шунингдек, амалдорларга босим ўтказган қурол компаниялари лоббистларининг исмларини ошкор қилишдан бош тортди.

Журналистлар Украина президентининг Мудофаа вазирлиги ва Бош штаб ўртасидаги можаро ҳақидаги сўзларини эслатиб, “бу можаро армияни бошқаришга халақит бермадими?” деб сўрашди. Федоровнинг айтишича, ўша пайтдаги бош қўмондон Александр Сирский билан шахсий тўқнашуви бўлмаган, уларнинг қарама-қаршилиги бошқача характерга эга эди.

“Бу кўпроқ дунёқарашлар тўқнашуви. Бизда асосан қарашларни амалга ошириш билан боғлиқ институционал зиддият, шунингдек, маданий зиддият ҳам бор эди. Чунки ёш лидерларга эркинлик бериш, қарорларни тезроқ қабул қилиш, бошланган ислоҳотларни охирига етказиш ва ҳоказолар зарур. Шу боис, бу кўпроқ институтлар ўртасидаги зиддиятдир”, дея хулоса қилди Федоров.