Трамп туғилганлик бўйича фуқаролик беришни чеклади

Трамп туғилиш орқали фуқаролик беришни чеклашга қаратилган фармонларни имзолади

АҚШ Президенти Доналд Трамп туғилиш асосида фуқаролик бериш тартибини чеклаш ва "туғуруқ туризми"га қарши федерал чораларни кучайтиришга қаратилган иккита фармонни имзолади. Бу ҳақда Оқ уй хабар берди.

Биринчи фармон АҚШ ҳудудида туғилганлиги сабабли автоматик фуқаролик ололмайдиган хорижликлар тоифасини кенгайтиради. Бу дипломатлар, хорижий ҳукуматлар манфаатларини ифодаловчи шахслар ва "душман давлатлар" фуқароларининг фарзандларига тегишли. Ҳужжат, шунингдек, АҚШнинг денгиз орти ҳудудларида туғилганларга ҳам тааллуқлидир.

Иккинчи фармон президентлик ваколатларини Давлат котиби ва Ички хавфсизлик вазирига топширади. Улар "туғуруқ туризми" амалиётига чек қўйиши шарт. Расмийлар хорижлик аёлларнинг АҚШга фақат фарзанд дунёга келтириш учун келиши ҳолатларини айнан шу ном билан таснифлаши керак. Ушбу тартиб худди шундай мақсаддаги суррогат оналикка ҳам тегишли.

АҚШ Конституциясига киритилган 14-тузатиш мамлакатда туғилган ва унинг юрисдиксиясига тушадиган ҳар қандай шахсга Америка фуқаролигини беришни, қонун олдида тенг ҳимояни таъминлашни ҳамда суд ҳукмисиз ҳуқуқлардан маҳрум этишни тақиқлашни назарда тутади. Трамп ушбу тузатишни бир неча бор танқид қилган.

Бу Трампнинг туғилиш ҳуқуқи асосида фуқаролик олишни чеклашга бўлган иккинчи уринишидир. 30-июн куни АҚШ Олий суди унинг инаугурация кунида имзолаган ва АҚШ фуқароси бўлмаган шахслардан туғилган болаларни автоматик фуқароликдан маҳрум қилувчи фармонини рад этганди.

Блоомберг ва Тҳе Валл Стреет Жоурнал нашрларининг тахмин қилишича, Трампнинг янги фармонлари устидан ҳам, эҳтимол, судга эътирозли аризалар берилади. Миграция сиёсати институти (МПИ) маълум қилишича, АҚШда ҳар йили "туғуруқ туризми" орқали тахминан 22 000 дан 26 000 гача чақалоқ дунёга келади. Институт тақдим этган ҳукумат маълумотларига кўра, 2024-йилда хорижий манзилга эга бўлган оналардан 9 600 нафар бола туғилган.