Трамп Ҳормуздан ўтадиган кемалардан 20 фоизлик солиқ олиш фикридан қайтди

Трамп Ҳормуз бўғозидан ўтадиган кемалардан 20 фоизлик солиқ олишдан воз кечди

АҚШ Ҳормуз бўғозидан ўтадиган кемаларга бож тўлови ундирмаслигини маълум қилди. Доналд Трамп 14-июл куни бу ҳақда ўзининг Трутҳ Сосиал ижтимоий тармоғида эълон қилди.

Трампнинг сўзларига кўра, у Яқин Шарқдаги етакчилар билан “самарали музокаралар” ўтказган ва шундан сўнг транзит солиғи ғоясидан воз кечишга қарор қилган. Энди Форс кўрфази давлатлари Вашингтон билан савдо ва инвестиция келишувларини имзолашни режалаштирмоқда. “Бу жуда улкан сармоя бўлади. Шу билан бирга, бу келишувлар уларнинг ўзи ва келажаги учун ҳам жуда фойдалидир,” деди Трамп.

АҚШ президентининг қўшимча қилишича, Ҳормуз бўғозининг тўлиқ блокадаси сақланиб қолади. Бироқ, бу тақиқ фақат Эрон портларига бораётган ва у ердан келаётган кемаларга, шунингдек, Эрон юкларини ташийдиган транспортларга тегишлидир.

Трамп 13-июл куни АҚШ Ҳормуз бўғозини ўз назоратига олишини эълон қилган эди. Ўшанда у кемаларнинг хавфсиз ўтишини таъминлаш эвазига компенсация олмоқчи эканини айтган. Кейинчалик Трамп бу тўлов ташилаётган юк қийматининг 20 фоизини ташкил қилишини тушунтирди.

Йирик кема эгалари АҚШ президентининг бу ташаббусига кескин қарши чиқди. Хусусан, дунёдаги бешинчи энг йирик контейнер ташувчи компания — Германиянинг Ҳапаг-Ллойд корхонаси Трампнинг юк қийматидан 20 фоиз ҳақ олиш ғоясини “мутлақо асоссиз ва нотўғри” деб баҳолади.