Трамп АҚШ ўқ-дорилари ҳақида маълумот тарқатганларга қамоқ билан таҳдид қилди
Трамп АҚШ ўқ-дорилари ҳақида маълумот тарқатганларни қамоқ билан таҳдид қилди
АҚШ президенти Доналд Трамп Эрон билан уруш фонида мамлакатда асосий ўқ-дорилар танқислиги борлиги ҳақидаги хабарларни рад этиб, захиралар етарли эканини таъкидлади ва бундай маълумотларни тарқатган шахслар жавобгарликка тортилишидан огоҳлантирди.
“АҚШда қурол-аслаҳа захираси жуда катта, айниқса, муайян турлар бўйича. Бунинг устига, зарур бўлганда катта миқдорда қурол ишлаб чиқарилмоқда ва Қўшма Штатларга етказиб берилмоқда. Мудофаа компаниялари мамлакатимиз тарихидаги энг кўп завод ва фабрикаларни қурмоқда”, деб ёзди Трамп ўзининг Трутҳ Сосиал платформасида.
Трамп, шунингдек, ушбу маълумотларни сиздирганлар қидирилаётганини ва уларга узоқ муддатли қамоқ жазоси берилишини қўшимча қилди. Ушбу баёнот АҚШ ОАВда тарқалган хабарлардан сўнг берилди. Унда узоқ масофага учувчи ракеталар захираси камайгани сабабли маъмурият Эрон бўйлаб қўшимча зарбалар беришни ортга сурганини ёзган эди.
Вашингтон Пост нашрининг хабар беришича, ўтган ҳафтада Мериленддаги Кемп Девидда ўтказилган Вазирлар Маҳкамаси йиғилишида Трамп уруш вазири Пит Ҳегсет билан тортишиб қолган. Бунга Эронга қарши ҳарбий имкониятларни чеклаётган ўқ-дориларнинг жиддий танқислиги сабаб бўлган.
Трамп ўқ-дорилар тақчиллиги муаммоси аллақачон бартараф этилган деб ўйлаганини айтган. Ҳегсет президент қаршисида ўзини оқлашга уриниб, етарли маълумот берилмагани учун айбни ўринбосари Стивен Файнбергга юклаган. Оқ уй матбуот котиби Каролин Левитт бу маълумотларга муносабат билдириб, Кемп Девиддаги учрашувда бундай ҳолат юз бермаганини айтди.