Тошкентдаги кўп қаватли уйда ёнғин чиқди, 26 киши эвакуация қилинди

Тошкентнинг Олмазор туманида жойлашган кўп қаватли уйда ёнғин содир бўлди, натижада 26 нафар фуқаро эвакуация қилинди. Бу ҳақда Фавқулодда вазиятлар вазирлиги ахборот хизмати маълум қилди.

Хабарга кўра, 5-август куни тунги соат 02:19 да Тошкент шаҳар Фавқулодда вазиятлар бошқармасига Олмазор тумани Уста Ширин кўчасида жойлашган кўп қаватли уйнинг 6-кириш йўлагидаги электр қутисида ёнғин чиққани ҳақида хабар келиб тушган.

“Дарё” нашрига келиб тушган мурожаатга кўра, ёнғин тумандаги “Ассалом Жомий” турар жой мажмуасида рўй берган. Бинонинг 4-қаватидаги хонадонларга кириш қисми зарар кўрган.

Қутқарув бўлинмалари воқеа жойига соат 02:25 да етиб бориб, ёнғинни соат 03:58 да тўлиқ бартараф этган.

Ёнғин натижасида 6-кириш йўлагидаги тахминан 60 погонометр электр кабеллари ёниб, шикастланган. Қутқарувчилар томонидан кўп қаватли уйдан 26 нафар фуқаро хавфсиз жойга эвакуация қилинган.

Ҳодиса оқибатида ҳеч ким тан жароҳати олмаган. Ҳозирда ёнғиннинг келиб чиқиш сабаби ва етказилган моддий зарар миқдори аниқланмоқда.