Тошкентда кичик бизнесга бино ва ер бепул берилади
Тошкентда кичик бизнесга давлат бинолари 10 йилгача, айрим ер участкалари эса 15 йилгача бепул фойдаланишга берилиши мумкин.
Тошкентда кичик бизнесга бино ва ер текинга берилади
Тошкент, Ўзбекистон (UzDaily.uz) — Ўзбекистон Президенти томонидан "Тошкент шаҳрини 2026–2027 йилларда ижтимоий-иқтисодий ривожлантириш бўйича қўшимча чора-тадбирлар тўғрисида"ги қарор имзоланди. Ушбу ҳужжатда фойдаланилмаётган давлат мулкини тадбиркорлик фаолиятига жалб этишнинг янги механизмлари белгиланган.
2026-йил 1-августдан бошлаб, Тошкент шаҳар ҳокими Савдо-саноат палатаси реестрига киритилган, ишлаб чиқариш ва хизмат кўрсатиш соҳаларида фаолият юритаётган кичик бизнес субьектларини қўллаб-қувватлашга доир айрим қарорларни қабул қилиш ваколатига эга бўлади.
Ҳужжатга кўра, бундай тадбиркорларга бўш турган давлат бинолари ва иншоотлари 10 йилгача муддатга бепул фойдаланишга берилиши мумкин. Бунда обьектларни таъмирлаш ва жиҳозлаш тадбиркорларнинг ўз маблағлари ҳисобидан амалга оширилиши мажбурий шарт ҳисобланади.
Шунингдек, кичик бизнес субьектлари майдони 1,5 минг квадрат метргача бўлган бўш ер участкаларида инвестиция лойиҳаларини амалга ошириш имкониятига эга бўладилар.
Қурилиш ишлари якунланиб, барпо этилган обьект давлатга топширилганидан сўнг, ер участкаси тадбиркорга 15 йилгача муддатга бепул фойдаланиш учун берилиши мумкин.
Қарорда таъкидланишича, ушбу янги чоралар фойдаланилмаётган давлат мулкини иқтисодий айланмага киритиш, кичик бизнесни қўллаб-қувватлаш ҳамда пойтахтда ишлаб чиқариш ва хизмат кўрсатиш фаолиятини кенгайтиришга қаратилган.