Таиландда россиялик опа-ука ўлдирилди, мамлакат бош вазири узр сўради

Таиландда россиялик ака-ука ўлдирилиши ортидан мамлакат бош вазири узр сўради. Бу ҳақда Тҳаи ПБС Невс хабар берди.

22 ёшли Диана Назимова ва унинг 17 ёшли укаси Роман Таиландда ўғирлаб кетилганидан сўнг ўлдирилди. Мамлакат бош вазири Анутин Чанвиракун ушбу фожиали ҳодиса учун узр сўради.

Назимовлар ака-укаси 2021-йилдан буён онаси билан Паттаяда яшаб келган. Улар 26-июл куни ижарага олинган мотоциклда уйдан чиқиб кетган ва шундан сўнг қайтиб келмаган. 31-июл куни полиция икки маҳаллий фуқарони (собиқ маҳкумлар) қўлга олди. Улар қотилликни тан олиб, россиялик ака-уканинг жасадлари яширилган жойни кўрсатди.

Айбланувчиларнинг сўзларига кўра, улар мотоциклни тортиб олмоқчи бўлган, бироқ ака-ука қаршилик кўрсатгани учун уларни ўлдирган. Маълумотларга кўра, Роман отиб ўлдирилган, Диана эса оғир тан жароҳатлари оқибатида ҳалок бўлган. Олиб қочилган мотоцикл эса қисман қисмларга ажратилиб, қабристон яқинига кўмилган.

Фожиадан сўнг бош вазир Анутин Чанвиракун ака-уканинг жасадлари топилган жойга ташриф буюрди ва терговни шахсан назорат қилишини айтди. У жиноят Таиланд обрўсига жиддий путур етказганини таъкидлаб, ҳукумат келгусида бундай воқеалар такрорланмаслиги учун барча зарур чораларни кўришга ваъда берди.

Анутин Таиланд қонунчилигига кўра ўлим жазоси мавжудлигини, аммо у суд ҳукмига кўра тайинланишини айтди.

“Агар суд бундай жиддий ҳолатда ўлим жазосини танласа, ахлоқ тузатиш департаменти ва Таиланд Қироллик полициясини назорат қилувчи ҳукумат қонуний жараённинг амалга оширилишини таъминлаши керак”, деди у.