Россия Киевдаги АҚШнинг дрон заводини йўқ қилган

Россия қўшинлари 26-июл куни Киевга берган зарба натижасида АҚШнинг Терминал Аутономй компаниясига тегишли дрон заводи вайрон бўлди. Бу корхона юқори аниқликдаги дронлар ишлаб чиқаришга ихтисослашган эди. Бу ҳақда Медуза Тҳе Гуардиан нашрига таяниб хабар берди.

Терминал Аутономй компанияси 2023-йилда АҚШнинг Делавер штатида ташкил этилган. У сунъий интеллект ва Россиянинг радиоелектрон кураш тизимларига чидамли мўлжалга олиш тизими билан жиҳозланган узоқ масофали дронлар ишлаб чиқаради. Ҳужум оқибатида ҳеч ким ҳалок бўлмаган. Компания Тҳе Гуардиан сўровларига жавоб бермади.

**Россия Мудофаа вазирлигининг баёноти**

Россия Мудофаа вазирлиги 26-июлдаги ҳисоботида рус қўшинлари Киевнинг жануби-ғарбий қисмида жойлашган дрон йиғиш ва сақлаш жойига зарба берганини маълум қилди. Вазирликнинг таъкидлашича, бу ерда Украина-Америка компанияси мутахассислари иштирокида ойига мингтагача дрон ишлаб чиқарилган. Бироқ компания номи ошкор этилмаган.

Тҳе Гуардиан нашрининг қайд этишича, бу зарба Россия кучларининг Америка компанияси обьектини қасддан нишонга олган биринчи ҳолати бўлиши мумкин. Шунга қарамай, рус қўшинлари илгари ҳам Украинадаги Америка компанияларига ҳужум қилган.

АҚШ разведкасининг собиқ юқори лавозимли ходими Энтони Винчи шундай деди: “Ишлаб чиқариш корхонаси кимга тегишли бўлишидан қатъи назар, россияликларга барибир. Бу улар учун барибир нишон ҳисобланади. У Американикими ёки бошқаникими — бунинг улар учун аҳамияти йўқ”.

Июл ойининг бошида президент Доналд Трамп АҚШ Украинага Патриот зенит-ракеталарини ишлаб чиқариш учун лицензия беришини айтган эди. Винчи бу ҳақда қуйидагича қўшимча қилди: “Агар Патриот ракеталари ёки бошқа Америка тизимлари Украинада ишлаб чиқарилса, Россия ушбу ишлаб чиқариш корхонасини ҳам нишонга олади деб ўйлайман”.

Куни кеча Украина АҚШ ва Франсия ёрдамида Россия нефт заводларига зарба бергани ҳақида хабар берилганди. Мамлакатлар Киевга Россия ҳаво мудофааси тизимлари қаерда жойлашганини аниқлашда ёрдам берувчи разведка маълумотларини тақдим этган. Украиналик мулозимларга кўра, бу маълумотлар дронларга ҳаво мудофаасини айланиб ўтиб, нефтни қайта ишлаш заводларига зарба беришга имкон яратган.