Россия Украина бўйлаб ёпирилма зарба йўллади
Бутун мамлакат бўйлаб камида саккиз киши ҳалок бўлган ва ўнлаб кишилар жароҳатланган. Ўз навбатида, украин дронлари Вилдберриесънинг яна учта региондаги омборларига ҳужум қилди.
Россия Украинага кенг кўламли ҳужум уюштирди
30-июлга ўтар кечаси Россия ҳарбийлари Украина ҳудудларига кенг кўламли ҳужум уюштирди. Бу ҳужумда 70 дан ортиқ ракета ва 280 дан зиёд дрон ишлатилган. Украина президенти Володимир Зеленскийнинг маълум қилишича, Киев шаҳри ва вилояти, шунингдек, Днипропетровск, Лвив, Полтава, Харкив, Миколайив, Суми, Винница, Черкасс ва Ивано-Франковск вилоятлари нишонга олинган. Ҳужумлар натижасида мамлакат бўйлаб саккиз киши ҳалок бўлган ва ўнлаб кишилар жароҳатланган.
Россия Мудофаа вазирлиги Киев, Лвив, Днипропетровск вилояти ва Украинанинг бошқа ҳудудларидаги ҳарбий аеродромлар, ҳарбий корхоналар ва логистика марказларига зарбалар берилганини тасдиқлади. Вазирлик, шунингдек, Одессада ва Жанубий портда "ҳарбий мол-мулк" етказиб бераётган юк кемалари ҳам нишонга олинганини таъкидлади.
Янги ҳужумлар фонида Зеленский ғарбий ҳамкорларни Украинани ҳимоя қилиш учун зарур бўлган ҳаво мудофааси тизимлари учун ракеталарни етказиб беришни кечиктирмасликка чақирди. Унинг сўзларига кўра, ўтган тунда Украина авиацияси Россия ракеталарининг катта қисмини уриб туширган ва "ҳатто мобил ўт очиш гуруҳлари ҳам қанотли ракеталарга қарши самарали ишлай олган".
Зеленский шундай деди: "Ҳамкорлардан ҳаво мудофааси тизимлари учун ракеталар танқис бўлган шароитда, ҳарбийларимиз деярли имконсиз ишларни амалга оширмоқда... Бу ҳаво ҳужумидан мудофаа тизимлари учун ракеталар етказиб берилмаганда ёки кечикканда одамларнинг ҳаётини сақлаб қоладиган ноёб маҳоратдир... Барча ҳамкорлар қандай ва нима билан ёрдам бера олишларини билишади. Ўз вақтида ёрдам бермаслик, баллистик ракеталарга қарши ракеталарни етказиб беришни кечиктириш айнан шундай вайронагарчиликларга, афсуски, бугунги кунда мавжуд бўлган қурбонларга олиб келади."
Украина Вилдберриес омборларига янги зарбалар берди: яна учта омбор ёнди
30-июл куни эрталаб Украина дронлари Вилдберриес маркетплейсининг яна учта логистика марказига ҳужум уюштирди. Компания Пенза яқинидаги ва Удмуртиянинг Сарапул шаҳридаги омборлар зарба остида қолганини тасдиқлади. Бу омборларда ёнғин чиққан. Пензадаги омборга ҳужум натижасида бир киши жароҳат олган.
Бундан ташқари, Украина дронлари Перм ўлкасидаги Вилдберриес омборига ҳам зарба берган. Бу ҳақда дастлаб Украинадаги Телеграм-каналлар зарбадан кейин ёнғин бошланганини акс эттирувчи фото ва видеоларга таяниб хабар берди. Кейинроқ Россиядаги "Агенство" ва Астра нашрлари Перм раёнининг Замулянка қишлоғида жойлашган логистика маркази ҳужумга учраганини маълум қилди. Компания ва маҳаллий расмийлар ҳозирча ҳужум юзасидан изоҳ бермаган.
18-июлдан буён Украина томонидан зарба берилган Вилдберриес омборлари сони 14 тага етди. Киев бу ҳужумларни ушбу омборларда дронлар учун эҳтиёт қисмлар ва икки мақсадли маҳсулотлар сақланиши билан изоҳлайди.