Ўзбекистоннинг халқаро рейтинглардаги ўсиши, Чиноздаги «Уятли хонадон», хусусий мактабларга субсидия - маҳаллий дайжьест
Ўзбекистон халқаро рейтингларда ўз ўрнини яхшилади, алоҳида эҳтиёжли болалар учун янги имтиёзлар жорий этилди, Чиноздаги «Шармандали маҳалла» тажрибаси эса кенг муҳокамаларга сабаб бўлди. Шунингдек, инфляциянинг сўнгги кўрсаткичлари, хориждан наслли чорва моллари импорти ва бошқа муҳим воқеалар - шу ва бошқа маҳаллий янгиликлар билан Kun.uz дайжьестида таништирамиз.
Ўзбекистоннинг халқаро рейтинглардаги ўсиши, Чиноздаги «Уятли хонадон» ҳолати, хусусий мактабларга субсидиялар ажратилиши – булар Kun.uz дайжьестининг асосий мавзуларидир. Шунингдек, инфляциянинг сўнгги кўрсаткичлари, наслли чорва моллари импорти ва бошқа муҳим воқеалар ҳам ушбу дайжьестда ёритилган.
**Ўзбекистон халқаро рейтингларда ўз ўрнини яхшилади**
Ўзбекистон бир қатор халқаро рейтинг ва индексларда сезиларли ютуқларга эришди. Хусусан, Иқтисодий эркинлик индексида мамлакат 14 поғона юқорилаб, 184 давлат орасида 86-ўринни эгаллади. 60,3 балл билан Ўзбекистон илк бор «ўртача эркин» давлатлар қаторига кирди.
Бундан ташқари, Фитч Ратингс ва С&П Ўзбекистоннинг суверен кредит рейтинги кутилмасини «ижобий»га оширди, Моодйъс эса мамлакатнинг кредит рейтингини бир поғонага кўтарди. «Аёллар, бизнес ва қонун» индексида ҳам Ўзбекистон 43 поғона кўтарилиб, 190 давлат орасида 48-ўринни эгаллади.
**Алоҳида эҳтиёжли болалар учун синф очган хусусий мактабларга субсидия берилади**
Президент қарори билан алоҳида таълим эҳтиёжи бўлган болаларни қўллаб-қувватлаш бўйича қўшимча чоралар белгиланди. Унга кўра, коррексион синфлар ташкил этган хусусий мактабларга давлат томонидан субсидия ажратилади. Шунингдек, эҳтиёжманд болалар ваучер тизими асосида ассистив жиҳозлар билан таъминланади.
Ногиронлиги бўлган абитуриентларга олийгоҳга кириш имтиҳонларида 50 фоиз қўшимча вақт берилади ҳамда Брайл алифбоси, аудио ва электрон форматдаги имтиҳон материалларидан фойдаланиш имконияти яратилади.
**Чинозда «Шармандали маҳалла» ва «Уятли хонадон» ёрлиқлари жорий этилди**
Кун давомида ижтимоий тармоқларда энг кўп муҳокама қилинган мавзулардан бири Чиноз туманидаги ҳолат бўлди. Тошкент вилоятининг Чиноз туманида ободонлаштириш талабларига жавоб бермайдиган ҳудудларга «Шармандали маҳалла» ва айрим уйларга «Уятли хонадон» ёрлиқларини осиш бўйича топшириқ берилгани кенг муҳокамаларга сабаб бўлди.
Ижтимоий тармоқларда тарқалган видеода туман ҳокими маҳалла ва хонадонларни шу тарзда белгилаш ҳақида кўрсатма бераётгани акс этган. Кейинчалик мазкур видео ҳокимлик саҳифасидан ўчириб ташланган. Маълум қилинишича, масъуллар хонадонларнинг тозалиги ва ободонлаштирилиш ҳолатини ўрганиб, натижалар бўйича ҳисобот тақдим этади.
**Ўзбекистонда йиллик инфляция 6,4 фоизни ташкил этди**
Иқтисодий янгиликларга тўхталадиган бўлсак, Ўзбекистонда 2026-йил июл ойи якунига кўра йиллик инфляция 6,4 фоизни ташкил этди. Миллий статистика қўмитаси маълумотига кўра, июл ойининг ўзида истеъмол товарлари ва хизматлари нархлари ўртача 0,1 фоизга пасайиб, дефляция қайд этилди.
Озиқ-овқат маҳсулотлари арзонлашиши умумий инфляциянинг секинлашишига ҳисса қўшган бўлса, айрим турдаги бензин, мобил алоқа хизматлари ва жамоат транспорти нархлари эса ошган.
**Ўзбекистонга 250 мингдан ортиқ наслли чорва моли олиб келинади**
Ўзбекистонда чорвачиликни ривожлантириш мақсадида Мўғулистон, Хитой, Европа давлатлари ва Беларусдан наслли чорва моллари олиб келинади. Режага кўра, Мўғулистондан 150 минг бош қўй, Хитой ва Европа давлатларидан 100 минг бош наслли қорамол, Беларусдан эса 2 минг бош наслли мол импорт қилиниши кўзда тутилган.
Ҳукумат ҳисоб-китобларига кўра, мазкур чоралар натижасида мамлакатда йиллик гўшт ишлаб чиқариш ҳажмини қўшимча 44 минг тоннага ошириш режалаштирилган.
**Қозоғистонлик фуқаро 2 килограмм опий билан ушланди**
Навоий вилоятида 2 килограммдан ортиқ опий билан кетаётган Қозоғистон фуқароси ушланди. Давлат хавфсизлик хизмати маълумотига кўра, унинг ёнидан 2 килограмм 87 грамм опий аниқланиб, ашёвий далил сифатида расмийлаштириб олинган.
Терговнинг дастлабки маълумотларига кўра, гиёҳвандлик воситаси аввалдан хуфия жойга яшириб кетилган бўлиб, хорижлик уни олиб кетаётган вақтида қўлга тушган. Ҳолат юзасидан жиноят иши қўзғатилиб, тергов ҳаракатлари олиб борилмоқда.
**АҚШдаги ўзбек оилаларининг мослашувига ёрдам берадиган платформа ишга тушди**
Хориждаги ватандошларимизга оид янгилик билан дастурни якунлаймиз. АҚШда истиқомат қилаётган ўзбек оилаларини қўллаб-қувватлашга қаратилган «Мослашув маркази УСА» платформаси ишга туширилди.
Лойиҳа оилаларнинг янги муҳитга мослашувини енгиллаштириш, эр-хотин ва фарзандлар ўртасидаги муносабатларни мустаҳкамлаш ҳамда психологик қийинчиликларнинг олдини олишга қаратилган. Платформада оилавий муносабатлар, фарзанд тарбияси, миграциянинг оилага таъсири ва АҚШ қонунчилиги бўйича амалий маслаҳатлар мунтазам эълон қилиб борилади.