Ўзбекистонликларни Кореяда ишга жойлаштириш бўйича “миграция иши” суди ёпиқ тартибда ўтади
Тошкентда ўзбекистонликларни Кореяга ишга юборишдаги эҳтимолий қонунбузилишларга оид иш бўйича суд бошланди. Судланувчилар орасида ДХХ собиқ ходимлари, Ташқи меҳнат миграцияси агентлиги раҳбарининг собиқ ўринбосари бор. Қонун билан муҳофаза қилинадиган маълумотлар сабабли суд ёпиқ тартибда ўтмоқда.
Ўзбекистон фуқароларини Кореяда ишга жойлаштириш билан боғлиқ "миграция иши" бўйича суд жараёни ёпиқ тарзда ўтказилмоқда. Жиноят ишлари бўйича Бектемир тумани судида пора олиш, жиноий йўл билан топилган даромадларни легаллаштириш ва ҳокимиятни суиистеъмол қилишда айбланаётган тўрт нафар шахсга нисбатан жиноят иши кўриб чиқилиши бошланди.
Олий суд сайтидаги маълумотларга кўра, суд муҳокамаси 29-июл куни судя Дурдона Дадахонова раислигида бошланган. Дастлабки тергов Бош прокуратура томонидан олиб борилган. Судланувчилар сифатида Алижон Ашуров, Алишер Худойбердиев, Сардорбек Тўраев ва Улуғбек Худойбердиев жалб этилган. Уларнинг барчасига Жиноят кодексининг 210-моддаси 3-қисми "а" ва "б" бандлари (пора олиш), 243-моддаси (жиноий фаолиятдан олинган даромадларни легаллаштириш) ҳамда 301-моддаси 1-қисми (ҳокимиятни суиистеъмол қилиш, ҳокимият ваколатидан ташқарига чиқиш ёки ҳокимият ҳаракацизлиги) бўйича айблов эълон қилинган.
Тошкент шаҳар судлари матбуот хизматининг хабар беришича, иш ёпиқ суд мажлисида кўрилмоқда. Бу қарор иш материалларида шахсий ҳаётга оид ва қонун билан ҳимояланган бошқа маълумотлар мавжудлиги сабабли қабул қилинган. Судлар жараён якунланганидан сўнг қўшимча маълумот берилишини билдирди.
Ҳуқуқ ҳимоячиси Абдураҳмон Ташановнинг таъкидлашича, ушбу иш Ўзбекистон фуқароларини Жанубий Кореяга ишга юборишдаги эҳтимолий қонунбузилишлар билан боғлиқ. Аввалроқ Бош прокуратура ҳузуридаги Иқтисодий жиноятларга қарши курашиш департаменти Ўзбекистон фуқароларини Жанубий Кореяга ишга юбориш билан боғлиқ эҳтимолий коррупсион схема юзасидан тергов олиб борилаётганини маълум қилган эди.
Тергов талқинига кўра, Бандлик вазирлиги ҳузуридаги собиқ Ташқи меҳнат миграцияси агентлигининг раҳбар ходимлари, хусусий бандлик агентликлари вакиллари ва бошқа шахслардан иборат бўлиши мумкин бўлган гуруҳ 35 нафар фуқародан 263,5 минг доллар олган. Кейинчалик тергов фуқаролардан расмий тўловлардан ташқари Жанубий Кореяга ишга жойлаштиришга кўмаклашиш учун 7 минг доллардан 12 минг долларгача маблағ ундирилган бўлиши мумкинлигини аниқлаган. Идора баҳосига кўра, олинган маблағларнинг умумий ҳажми тахминан 90 миллион долларни ташкил этиши мумкин.
Шунингдек, пул тўлаган, аммо Жанубий Кореяга ишга кета олмаган 600 нафардан ортиқ фуқаро жабрлангани аниқланган. Бундан ташқари, идора бошқа ҳолатлар ҳақида ҳам маълумот берган. Улардан бирида 230 нафар фуқаро ва 580 минг доллар, яна бирида эса қарийб 1000 нафар одам ва 5,6 миллион доллар тилга олинган. Яна бир қатор эпизодлар бўйича маблағларнинг умумий ҳажми 45 миллион долларга баҳоланган.
Департамент ушбу уюшган гуруҳ фаолиятидан жабр кўрган фуқароларни 71 233 10 07 рақамли ишонч телефони орқали мурожаат қилишга чақирган ва мурожаатчиларнинг шахси сир сақланишини билдирган.