Ўзбекистонлик тиббиёт ходимлари Чехияга ишга юборилиши мумкин
Чехия компанияси келгусида Чехияда ишга жойлаштириш учун Ўзбекистонда ҳамшираларни тайёрлайдиган ихтисослаштирилган ўқув курсларини ташкил этиш имкониятини ўрганаётганини маълум қилди.
Ўзбекистонлик шифокорлар ва ҳамширалар Чехияда ишлаш имкониятига эга бўлиши мумкин. Бу ҳақда Ўзбекистоннинг Чехиядаги элчихонасида “ЗЙЛОРА” компаниясининг бизнесни ривожлантириш бўйича менежери Зилола Иргашева билан бўлиб ўтган учрашувда сўз юритилди.
Музокаралар давомида Ўзбекистон Миграция агентлиги ва Чехия Соғлиқни сақлаш вазирлиги ўртасидаги келишув асосида тиббиёт ходимлари ва ҳамшираларни Чехияга ишга жалб қилиш масалалари муҳокама қилинди. Томонлар ушбу йўналишдаги ҳамкорликни кенгайтириш, малакали мутахассисларнинг қонуний ва тартибли ишга жойлашишини таъминлашга келишиб олдилар. Шунингдек, Ўзбекистон ва Чехия ўртасида меҳнат миграцияси соҳасидаги ҳамкорликни ривожлантириш истиқболлари кўриб чиқилди.
“ЗЙЛОРА” компанияси вакиллари келажакда Чехияда ишлаш учун Ўзбекистонда ҳамшираларни тайёрлайдиган махсус ўқув курсларини ташкил этиш имкониятини ўрганаётганини маълум қилди. Компания, шунингдек, Ўзбекистондан Чехияга тиббиёт ходимларини юборишни тартибга солувчи амалдаги қонунчилик, тартиб-таомиллар ва меъёрий-ҳуқуқий базани батафсил ўрганиш ниятида эканлигини билдирди. Бу компаниянинг ушбу йўналишдаги келгуси фаолият стратегиясини ишлаб чиқишга хизмат қилади.