Одамлар йиқилиб, жароҳат оляпти - Андижонда қазилган чуқурлар чала ташлаб кетилди

Андижоннинг Эски шаҳар қисмида феврал ойида бошланган канализация чуқурларини қазиш ишлари якунига етказилмай, чала ҳолатда қолдирилгани сабабли бир неча киши жароҳат олди. Жабрланганлар орасида ёш бола ва кекса ёшли эркак бор бўлиб, улар даволаниш харажатларини ўз чўнтагидан қоплашга мажбур бўлишган. Хавфсизлик қоидаларининг бузилиши яққол кўриниб турганига қарамай, ишлар тўхтаб қолган. Бу ҳолат ҳокимлик томонидан маблағ ажратилмаётгани билан изоҳланмоқда. Эслатиб ўтамиз, аввалроқ "Андижон полка" рақсини рекордлар қаторига киритиш учун 730 миллион сўм сарфланган эди.

Гап Андижон шаҳридаги Заҳириддин Муҳаммад Бобур маҳалласи ҳудуди ҳақида кетмоқда. Маҳаллий аҳоли вакилларидан бирининг Kun.uz'га ма'лум қилишича, "Ҳудудда яшовчи ёш болалардан бири реанимацияда ҳам ётиб чиқди. Яқинда 70 ёшли қўшнимиз ҳам шу чуқурликка йиқилди."

Қазилган жойга одамлар чиқинди ташлаб кетишмоқда, бу эса атрофни қўланса ҳид билан тўлдирган. Маҳаллада Заҳириддин Муҳаммад Бобур музейи жойлашган бўлиб, бу жойга сайёҳлар ҳам ташриф буюради.

Аҳоли вакили шунингдек, кўчадан иккита машина ўтгудек бўлса, тирбандлик юзага келаётганини, битта машина зўрға ўтаётганини та'кидлади. Қиш келиши билан қировли кунларда вазият янада аянчли бўлишидан хавотир билдирилмоқда. Йўл бўйида савдо қиладиган тадбиркорлар дўконларига ўтиш учун хавфли кўприклар қуриб олишган. Чуқур туфайли кўплаб савдогарларнинг савдоси пасайиб кетган.

**"Ўғлим чуқурга йиқилган, қарзимиздан ҳалиям қутула олмадик"**

Чуқур туфайли ўғли азият чеккан она Дилрабо Назирова шундай дейди: "Ўғлим шу чуқурликка йиқилди. Бош миясидан жароҳат олиб, шифохоналарда ётиб чиқди. Қарз ҳавола қилиб, амаллаб дори-дармон топиб бердик. Шароитим оғирлигидан ҳалиям ўша қарзлардан қутулолганимиз йўқ. Катта фарзандим ҳам бетоб, унинг дориларидан орттириб қўшимча шифокорларга кўрсатиш учун кичик фарзандимга имконият қила олмадим."

"Боламда йиқилиш асорати қолган, шифокорларга кўрсатинг дейишди. Лекин имкониятим йўқ. Шифохонада ётган кунларимдаги қарзларим ҳали ҳам узилгани йўқ. Фарзандим шу аҳволга тушди, бошқаларнинг боласи азобланишини хоҳламайман. Илтимос, чуқурни тезроқ ёпиб беришсин," дея қўшимча қилди у.

Назированинг сўзларига кўра, маҳалла раисига мурожаат қилганларида, у боланинг чуқурликка эмас, балки уйда йиқилганини айтиб, ишни ёпишга ҳаракат қилган.

**Ёқилғисиз қолган экскаваторчи...**

Ҳудудда истиқомат қилувчи аҳоли вакилининг ма'лумотига кўра, ищиларга ойлик маош берилмагани сабабли қурилиш ишлари якунига етмай қолган.

"Уйимиз ёнига экскаваторини қўйиб кетган ҳайдовчи билан гаплашиб қолдим. У қурилиш ишларига жалб қилинган экан. Ҳайдовчи ойлик тугул техникасини бошқариш учун ёқилғисига ҳам пул берилмаётганидан шикоят қилди. Маблағ йўқлигидан бошқа ищилар ҳам кетиб қолган," дейди у.

**"Ҳоким ўринбосаридан сўранг"**

Ҳудудда қурилиш ишларини олиб бораётган "Юксалиш-Умид" МЧЖ қурилиш ишлари назоратчиси билан телефон орқали суҳбатлашганимизда, у маҳалладаги инфратузилма анча эскирганини ва қазилган йўналишда барча коммуникация воситалари (канализация, сув, электр) бир жойда ўтиши учун керакли ишлар қилинаётганини айтди.

Қурилишнинг тўхтаб қолиши сабабини эса Андижон шаҳар ҳокими ўринбосари Улуғбек Тўрақуловдан сўраш мақсадга мувофиқлигини та'кидлади. Назоратчи ҳудудда тез фурсат ичида яна ишлар бошланишидан умид билдирди.

Андижон шаҳар ҳокими ўринбосари Улуғбек Тўрақулов билан боғланишнинг иложи бўлмади. Аввал йиғилишда дея айтилган ҳоким ўринбосари кейин қўнғироқларимизга жавоб бермади.

Ма'лумот ўрнида, Андижон вилояти бюджетининг 2026-йил захира жамғармаси ҳисобидан Маданият бошқармасига "Андижон полка" рақсини "Гиннес рекордлари" китобига киритиш билан боғлиқ харажатларга 730 миллион сўм миқдорида маблағ ажратилган эди.