“Манчестер Сити” Родри ўрнига “Ливерпул” футболчисини сотиб олиши мумкин

“Манчестер Сити” Родри кетган тақдирда унинг ўрнига “Ливерпул”дан футболчи сотиб олиши мумкин.

Англиянинг “Манчестер Сити” клуби ёзги трансферлар даврида яримҳимоячи Родри жамоани тарк эца, унинг ўрнига “Ливерпул” футболчиси Алексис Макаллистерни олиб келишни кўзламоқда.

Журналист Метт Тиленнинг хабар беришича, “Манчестер Сити” вакиллари 27 ёшли Макаллистернинг агентлари билан унинг эҳтимолий трансфери бўйича музокаралар олиб бориш учун боғланган. Макаллистер жамоани тарк этиши кутилаётган Родри ўрнини эгаллаш учун асосий номзодлардан бири ҳисобланади.

ТЕАМталк инсайдери Грем Бейлининг маълумотига кўра, Родри “Реал”га эмас, балки “Барселона”га ўтишни афзал кўрмоқда. Испаниялик футболчи шу сабабли Мадрид клуби билан музокараларни тўхтатган. 30 ёшли футболчининг “Сити” билан амалдаги шартномаси 2027-йилнинг ёзида тугайди ва ҳозирча у шартномани узайтириш ниятида эмас.

Маълумот учун, Алексис Макаллистер 2023-йилдан буён “Ливерпул”да ўйнаб келади. У мерсисайдликлар сафида Англия Премьер Лигаси ва Лига Кубогини қўлга киритган. Ҳозирда у Премьер Лиганинг энг яхши яримҳимоячиларидан бири саналади.