Жанубий Корея футболида йирик можаро: хорижлик ҳакамларга жинсий хизматлар кўрсатилгани маълум қилинди

Жанубий Корея футболида катта шов-шув: хорижлик ҳакамларга жинсий хизматлар кўрсатилгани ҳақида маълумотлар пайдо бўлди.

Жанубий Корея футболида яна бир йирик можаро юзага келди. Маҳаллий ОАВ хабарларига кўра, Жанубий Корея футбол ассоциацияси (КФА) 2011-2012-йилларда халқаро ўйинларда ишлаган айрим хорижлик ҳакамлар учун жинсий хизматлар ташкил этган бўлиши мумкин. Мақсад ҳакамларнинг қарорларига таъсир ўтказиш бўлгани айтилмоқда.

ЖТБС телеканалининг маълумотларига кўра, бу айбловлар Жанубий Корея Маданият, спорт ва туризм вазирлиги томонидан 2016-йилда тайёрланган махфий аудит ҳужжатларига асосланади. Ҳисоботда КФА мансабдор шахсларининг хорижлик ҳакамлар учун "массаж хизматлари"ни ташкил этгани қайд этилган.

КФАнинг собиқ ходимларидан бири телеканалга берган интервюсида ассоциация ҳакамларнинг "ўз фойдалари учун ҳуштак чалиши"ни истаганини айтган.

Ёнҳап агентлигининг хабарига кўра, ушбу учрашувларда Япония, БАА, Эрон, Баҳрайн ва Ўзбекистон вакили бўлган ҳакамлар иштирок этган. Бироқ, ҳозирча айнан қайси ҳакамлар ноқонуний хизматлардан фойдалангани тасдиқланмаган.

**КФА аллақачон бошқа тергов марказида**

Айни пайтда КФА яна бир можаро юзасидан ҳам полиция текшируви остида. Гап Жанубий Кореянинг 2026-йилги ФИФА Жаҳон чемпионатидаги муваффақияциз иштирокидан сўнг терма жамоа бош мураббийларини тайинлаш жараёнидаги эҳтимолий қонунбузарлик ва қариндош-уруғчилик ҳолатлари ҳақида бормоқда.

6-август куни полиция 2024-йил июл ойида Ҳонг Мёнг-Бонинг бош мураббий этиб тайинланиши юзасидан тергов доирасида КФА бош қароргоҳида тинтув ўтказди.

ЖТБС суриштируви ортидан КФА вакили қуйидагича изоҳ берди:

"15 йил аввал нохуш воқеалар бўлган бўлиши мумкин, аммо бугунги кунда биз ахлоқий меъёрларга қатъий амал қиламиз".

Шунингдек, у ассоциация ҳужжатларни атиги беш йил давомида сақлашини, шу сабабли эски воқеаларни тасдиқлаш имконияти йўқлигини билдирган.

**Аудитда нималар аниқланган?**

ЖТБС маълумотларига кўра, вазирликнинг 2016-йилдаги аудити давомида 2011-йил мартидан 2012-йил мартигача бўлган даврда КФА хорижлик ҳакамларни етти маротаба меҳмон қилгани ва бунда 20 нафар ҳакам иштирок этгани аниқланган.

Дастлаб аудит КФА мансабдор шахсларининг корпоратив банк карталаридан шахсий харажатлар учун фойдаланган ёки йўқлигини текшириш мақсадида бошланган. Текширув давомида хорижлик ҳакамлар ушбу харажатлардан фойда кўргани аниқланган бўлса-да, вазирлик кейинчалик ишни қўшимча чоралар кўрмасдан ёпган.

Мазкур ҳолатлар орасида 2014-йилги Жаҳон чемпионати саралаши ҳамда 2012-йилги Лондон Олимпиадаси саралаш баҳслари ҳам бўлган.

**Гангнамдаги массаж салонлари**

Аудитга кўра, 2012-йил 29-феврал куни Сеулда бўлиб ўтган Жанубий Корея – Қувайт (2:0) учрашуви олдидан КФА корпоратив картаси орқали Гангнам туманидаги массаж салонида икки нафар ҳакам учун 500 минг вон тўланган.

Вазирлик ушбу тўлов жинсий хизматларни ҳам ўз ичига олган деган хулосага келган. Ўша даврда айрим массаж салонлари қўшимча ҳақ эвазига ноқонуний жинсий хизматлар кўрсатиши билан танилган эди.

КФА Ҳакамлар бўлимининг собиқ ходими, шахси "жаноб Б" сифатида яширилган манбанинг айтишича:

"Массаж нархига жинсий хизматлар ҳам кирган. Буни аввал хорижлик ҳакамларнинг ўзи сўраган".

Юзи беркитилган ва овози ўзгартирилган ҳолда интервю берган собиқ ходим ҳакамлар узоқ парвозлардан кейин шикоят қилишини айтган.

"Улар: 'Узоқ учдик, ўзимизни яхши ҳис қилмаяпмиз', дерди. Биз эса уларни рози қилишга ҳаракат қилардик. Ахир шундан кейин улар бизнинг фойдамизга ҳуштак чалиши мумкин эди".

Бироқ ЖТБС ушбу хизматлардан айнан қайси ҳакамлар фойдалангани мустақил равишда тасдиқланмаганини қайд этган.

**Яна икки ҳолат**

Аудитда 2011-йил 22-сентабр куни Жанубий Корея – Уммон учрашувидан сўнг Чангвон шаҳридаги массаж салонига 760 минг вон тўлангани ҳам қайд этилган. Вазирлик бу маблағ тўрт нафар ҳакам учун жинсий хизматлар ташкил этишга сарфланган деган хулосага келган.

Шунингдек, 2012-йил 14-март куни Жанубий Корея – Қатар (0:0) учрашуви вақтида Гангнамдаги яна бир массаж салонига 198 минг вон тўланган. Аудитда бу сафар ҳакамлар инспектори учун жинсий хизмат кўрсатилгани айтилади.

**ФИФА қоидаларига зид**

Футбол этикаси бўйича мутахассисларга кўра, ҳакамларга таъсир ўтказишга уриниш ФИФА интизом қоидаларининг энг оғир бузилишларидан бири саналади. Матч-фиксинг ва коррупсия футболдаги энг жиддий ахлоқий қоидабузарликлар қаторига киради.

Жанубий кореялик футбол шарҳловчиси Парк Мун-Соннинг фикрича, мазкур можаро халқаро миқёсда катта резонанс келтириб чиқариши мумкин.

"Бу можаро халқаро баҳс-мунозараларга сабаб бўлиши мумкин. Ҳакамларга таъсир ўтказишга уриниш жуда оғир қоидабузарлик ҳисобланади", дейди у.