Испания собиқ бош вазирининг Франсия миллий жамоаси ҳақидаги гапи катта можарога сабаб бўлди

Испания собиқ бош вазирининг Франсия миллий жамоаси ҳақидаги баёноти катта баҳс-мунозараларга сабаб бўлди. Испаниянинг собиқ раҳбари Мариано Рахой ЖЧ—2026 ярим финалида Испания ва Франсия ўртасидаги ўйиндан олдин танқидлар остида қолди. Бунга унинг Франсия миллий жамоаси таркибида “франсуз футболчилари йўқ” деган фикри сабаб бўлди.

Испаниянинг амалдаги бош вазири Педро Санчес бу сўзларни ирқчилик деб атади. “Кимдир ҳамон одамларнинг қаерга мансублигини унинг фамилияси, туғилган жойи ёки терисининг рангига қараб ўлчамоқда. Испания — бу юртни севадиган ва унинг равнақи йўлида меҳнат қиладиган инсонларникидир. Ксенофобик баёнотлар билан мамлакатни шарманда қиладиганларга эмас,” деб ёзди Санчес ўзининг Х саҳифасида.

Шунингдек, Испания транспорт вазири Оскар Пуенте Рахойни “Франко (собиқ диктатор) давридан қолиб кетган аҳмоқ” деб атади.

Франсиялик сиёсатчилар ҳам бу ҳолатга жиддий муносабат билдирди. Мамлакат ички ишлар вазири Лоран Нуньес буни мутлақо қабул қилиб бўлмайдиган ҳолат деб баҳолади, анти-дискриминация вазири Орор Берже эса спортчилар бошқа мезонларга қараб эмас, балки фақат иқтидорига қараб баҳоланиши кераклигини таъкидлади.

Коммунистик партия етакчиси Фабьен Руссел вазиятни Парагвай сенатори Селесте Амарилланинг Килиан Мбаппега қаратилган сўзларига ўхшатди (эслатиб ўтамиз, Амарилла аввалроқ Мбаппени “ўзини франсуз қилиб кўрсатаётган камерунлик” деб атаганди). Руссел бу каби жирканч ирқчилик тўхтамаётганидан афсусда эканини билдирди.

Ҳолат юзасидан Франсиянинг Мадриддаги элчихонаси ўзининг ижтимоий тармоқдаги саҳифасида расмий жавоб қайтарди: “Франсия терма жамоасининг барча ўйинчилари — франсузлардир. 26 нафар футболчининг 23 нафари Франсияда туғилган. Хорижда туғилган 3 нафари ҳам франсуз ҳисобланади.”

Маълумот учун, Франсия ва Испания терма жамоалари ўртасидаги яримфинал учрашуви 14-июлдан 15-июлга ўтар кечаси соат 00:00 да бошланади.