Зеленский “Нафтогаз” раҳбарини бош вазир этиб тайинламоқчи

Зеленский “Нафтогаз” раҳбарини бош вазир этмоқчи

Украина президенти Владимир Зеленский “Нафтогаз” энергетика компанияси раҳбари Сергей Корецкийга мамлакат бош вазири лавозимини таклиф қилди. Бу ҳақда “Украинская правда” манбаларига таяниб хабар берди.

Аввалроқ Финансиал Тимес ва “РБК-Украина” Корецкийни ҳукумат раҳбари лавозимига асосий номзодлардан бири сифатида кўрсатган эди. У 48 ёшда бўлиб, 2025-йилдан буён “Нафтогаз” бош директори сифатида фаолият юритмоқда.

Корецкий аввал “Укрнафта” компаниясини уч йил давомида бошқарган. Бу компания ҳукумат томонидан олигарх Игор Коломойскийдан тортиб олинган ва миллийлаштирилганидан кейин бошқарилган.

“Украина 24” канали хабар беришича, Корецкий даврида “Укрнафта” зарар кўришдан фойда олишга ўтиб, энг муваффақиятли давлат компанияларидан бирига айланган.

Манбаларга кўра, Зеленский Корецкийнинг фаолиятини диққат билан кузатиб борган ва уни “энг кучли давлат менежерларидан бири” деб ҳисоблаган. Президент унга бош вазирликни таклиф қилганида, Украина энергетика тизимини ҳимоя қилиш ва келгуси қишга тайёргарлик кўришни энг муҳим вазифалар сифатида белгилаган. Россиянинг энергетика обьектларига ҳужумлари натижасида ушбу қиш урушнинг энг оғир кечиши кутилмоқда.

“Корецкий Зеленскийнинг таклифидан ҳайрон бўлди, лекин розилигини билдирди. У олдинда турган қийинчиликлар кўламини тўлиқ англамаётганини, аммо синаб кўришга тайёрлигини қўшимча қилди”, деб хабар берди “Украинская правда” манбалари.

Ўтган ҳафта Украинанинг АҚШдаги элчиси Олга Стефанишина дипломатик хизматдан кетишини эълон қилгач, Зеленский Вазирлар маҳкамасини ўзгартиришга қарор қилди. Бу кутилмаган истеъфо унинг учун “муаммодан кўра кўпроқ имконият”га айланди. Зеленский бош вазир Юлия Свириденкони Вашингтонга янги элчи этиб тайинлади.

Свириденконинг дипломатик лавозимга ўтиши ҳақида Финансиал Тимес хабар беришича, у хомашё битимини тайёрлаш жараёнида Доналд Трамп жамоаси аъзолари билан алоқаларни ўрнатишга муваффақ бўлган.