Инфантинонинг Европа Суперлигаси бўйича яширин музокаралар олиб боргани фош бўлди

Инфантинонинг Европа Суперлигаси бўйича яширин музокаралари фош этилди

Халқаро футбол федерацияси (ФИФА) президенти Жанни Инфантино Европа Суперлигасини ФИФА Суперлигаси номи остида қайта ташкил этиш бўйича махфий музокаралар олиб боргани маълум бўлди. Тҳе Гуардиан нашрининг хабарига кўра, томонлар 2020-йилнинг октябр ойида дастлабки келишувга эришган.

Манбага кўра, музокаралар шунчалик узоқ давом этганки, ҳатто дастлабки шартнома ҳам тўлиқ тайёрлаб қўйилган. Ҳамкорлик камида 12 йилга мўлжалланган бўлиб, келишув доирасидаги тижорат операцияларини бошқариш учун махсус қўшма ташкилот тузиш таклиф этилган.

ФИФА Суперлигасида жами 20 та жамоа иштирок этиши кўзда тутилган эди:

* 15 та доимий аъзо клуб;

* 5 та мавжуд мусобақалар орқали йўлланма олувчи клуб.

Шунингдек, худди шу жамоалар таркиби билан аёллар ўртасида ҳам шунга ўхшаш мусобақа ташкил этилиши режалаштирилган.

Ҳужжатда қайд этилишича, ФИФА мусобақа капиталида имтиёзли улушга эга бўлиши керак эди. Бу орқали ташкилот турнир форматини ўзгартириш, тақвимни мослаштириш, молиявий тўловларни тақсимлаш ва бош директорни тайинлаш каби муҳим масалаларда ҳал қилувчи қарорларни қабул қилиш ҳуқуқини қўлга киритарди.

Лойиҳада кенгайтирилган Клублар ўртасидаги Жаҳон чемпионатининг янги версиясини — “глобал клублар мусобақаси”ни яратиш ҳам назарда тутилган. Ушбу турнир ҳар йили уч ҳафталик белгиланган муддатда, фақат плей-офф тизимида ўтказилиши ва тўғридан-тўғри Суперлигага боғланиши режалаштирилган эди.

Гарчи дастлабки шартномада янги турнирлар ФИФА Конгресси ва Кенгаши томонидан расман маъқулланиши кераклиги ёзилган бўлса-да, маълумотларга кўра, бошқа федерациялар бу режанинг тузилишидан умуман бехабар бўлган. Инфантино эса ушбу лойиҳада шахсан ўзи иштирок этган ва жараён қандай ривожланаётганини тўлиқ назорат қилиб борган.