Франсиянинг Зидан қўл остидаги биринчи ўйини учун барча 80 000 та чипта 24 соат ичида сотилиб бўлди

Зинедин Зиданнинг Франсия терма жамоаси бош мураббийи этиб тайинланиши ортидан, унинг жамоа бошидаги илк ўйини учун барча 80 000 та чипта 24 соат ичида сотилиб кетди.

РМС Спорт нашрининг маълум қилишича, афсонавий мураббий бощилигидаги миллий терма жамоанинг уй майдонидаги биринчи учрашуви учун барча чипталар бир суткадан камроқ вақт ичида тўлиқ сотилган.

Чипталар 31-июл куни сотувга чиқарилган ва эртаси куниёқ тугаган. Зиданнинг мураббийликдаги дебюти 2-октябр куни Миллатлар Лигасида бўлиб ўтади, ўшанда Франсия терма жамоаси Италияни қабул қилади. Мамлакатнинг асосий стадиони бўлган “Стад де Франс” тахминан 80 000 томошабинни сиғдира олади.

Франсия футбол федерацияси Зидан билан тўрт йиллик шартнома имзоланганини расман эълон қилган эди. Франсуз мураббийи 2021-йилдан бери мураббийлик фаолияти билан шуғулланмаётганди. У бунгача “Реал Мадрид”га икки марта мураббийлик қилган: 2016-йилдан 2021-йилгача. Унинг фаолияти давомида Мадрид клуби 11 та совринни қўлга киритди, жумладан, учта Чемпионлар Лигаси чемпионлигига эришди.