Ферран Торрес қандай шарт билан “Барселона”да қолиши мумкинлигини маълум қилди

Ферран Торрес "Барселона"да қолиш шартларини ошкор қилди

"Барселона" ва Испания терма жамоаси ҳужумчиси Ферран Торрес клубдан кетиши мумкинлиги ҳақидаги миш-мишларга жавоб берди. Аввалроқ, 26 ёшли футболчи жамоада ўзини етарлича қадрланмаган ҳис қилаётгани ва "ПСЖ"га ўтиш имкониятини кўриб чиқишга тайёрлиги ҳақида хабарлар тарқалган эди.

"Барселона" сизни сақлаб қолиш учун нима қилиши керак?" деган саволга Торрес шундай жавоб берди: "Барса" мени қадрлашини кўрсатиши керак; улар музокараларга киришишлари ва барча масалалар муҳокама қилиниши зарур. "ПСЖ" клубининг қизиқишидан хурсандман. Аммо менинг "Барса" билан шартномам бор. Футболда нима бўлишини ҳеч қачон билмайсиз, лекин яхши томони шундаки, менинг шартномам борлиги сабабли, мен кутиб, ўзим қарор қабул қила оламан."

Ўтган мавсумда Ферран Торрес барча мусобақаларда 49 та ўйинда майдонга тушиб, 21 та гол урди ва учта голли узатмани амалга оширди. Футболчининг клуб билан амалдаги шартномаси 2027-йил ёзигача амал қилади. Трансфермаркет порталида тақдим этилган маълумотларга кўра, футболчининг бозор қиймати 50 миллион еврони ташкил қилади.