Фарғона гарнизонида янги ўқ отиш спорти мажмуаси очилди
Мажмуа таркибидан назарий ўқув синфи, ўқув ва йўриқчилар хоналари ҳамда 20 та ўқ отиш йўналишига эга замонавий тир ўрин олган. Иншоот бир вақтнинг ўзида 20 нафаргача спортчи ва машғулот иштирокчиларини қабул қилиш имкониятига эга.
Фарғона гарнизонида янги ўқ отиш спорти мажмуаси ишга тушди
Ўзбекистон Мудофаа вазирлигининг Фарғона гарнизонидаги ҳарбий қисм ҳудудида 1-август куни ўқ отиш спорти мажмуаси ва спорт зали очилиш маросими бўлиб ўтди. Бу ҳақда вазирликнинг Ахборот ва оммавий коммуникациялар департаменти Kun.uz нашрига хабар берди.
Тадбирда Ўзбекистон мудофаа вазири генерал-лейтенант Шуҳрат Холмуҳамедов, Фарғона вилояти ҳокими Хайрулла Бозоров ҳамда жамоатчилик вакиллари иштирок этди.
Маълумотларга кўра, ҳарбий-маъмурий сектор маблағлари ҳисобидан қурилган ушбу мажмуа қурилиши 2025-йил сентябр ойида бошланиб, 2026-йил июл ойида якунланган.
Мажмуа таркибига назарий ўқув синфи, ўқув ва йўриқчилар хоналари, шунингдек, 20 та ўқ отиш йўналишига эга замонавий тир киради. Иншоот бир вақтнинг ўзида 20 нафаргача спортчи ва машғулот иштирокчиларини қабул қилиш имкониятига эга.
Очилиш маросимида меҳмонларга амалий ўқ отиш машғулотлари, фотоелектрон тренажёрларда ўқув жараёнлари ва кўргазмали чиқишлар намойиш этилди. Шунингдек, вилоятда ўқ отиш спортини ривожлантириш борасида амалга оширилаётган ишлар ва эришилган натижалар ҳақида маълумот берилди.
Вазирлик хабарида таъкидланишича, "Бугунги кунда Фарғона вилоятида 184 нафар ёш ўқ отиш спорти билан мунтазам шуғулланмоқда. Янги мажмуанинг фойдаланишга топширилиши ушбу спорт турини янада оммалаштириш, иқтидорли ёшларни қўллаб-қувватлаш ҳамда ҳарбий-амалий спортни ривожлантиришга хизмат қилади".