Будапештда ярадор тўнғиз метрода саросимага сабаб бўлди
Тўнғиз фавқулодда вазиятлар оқибатларини бартараф этиш хизмати ходимлари томонидан тутилганида, унинг ярадорлиги аниқланган. Ҳодиса жойига чақирилган ветеринар унинг ҳолатини баҳолаб, ҳайвонни отиб ташлаш тўғрисида қарор қабул қилган.
Будапештда жароҳатланган ёввойи чўчқа метрода тартибсизликка сабаб бўлди.
Будапешт марказида кезиб юрган ёввойи чўчқа метро бекатига кириб кетиши оқибатида йўловчилар эвакуация қилинди ва метро ҳаракати вақтинча тўхтатилди. Бу ҳақда Будапешт транспорт компанияси (БКВ) маълум қилди.
Компания баёнотида айтилишича, "ҳайвон қисқа муддатга вагонлардан бирига кирган, аммо ҳеч бир йўловчи жабрланмаган. Кейин у вагондан чиқиб, хизмат зинапоясидан тушган ва бекатда турган поезд остига кириб олган. БКВ ходимлари зудлик билан бекатни эвакуация қилиб, ёпишди. Барча йўловчилар ҳудудни хавфсиз тарзда тарк этишди".
Маълум бўлишича, ёввойи чўчқа фавқулодда вазиятлар хизмати ходимлари томонидан тутилганида, унинг жароҳатлангани аниқланган. Воқеа жойига чақирилган ветеринар унинг ҳолатини баҳолаб, ҳайвонни отиб ташлашга қарор қилган.
Будапешт мери Гергелий Карачон Фасебоок саҳифасида шундай ёзди: "Ёввойи чўчқа туфайли метронинг М2 йўналишида автобуслар қатнови йўлга қўйилди. Бундай воқеа ҳақида ёзишимга тўғри келишини ҳеч қачон ўйламаган эдим. Ёввойи чўчқа "Лаёш Кошут майдони" метро бекатига қандай кириб қолгани номаълум".
Венгрия Миллий овчилик палатаси матбуот котиби Аттила Фелдварининг сўзларига кўра, ёввойи чўчқалар инсон учун хавф туғдириши мумкин. Шу сабабли, одамлар билан тўқнаш келганда ёввойи чўчқани зарарсизлантиришнинг энг хавфсиз усули уни отиб ташлаш ҳисобланади.
Ёввойи чўчқа қаерда жароҳатлангани ва метро бекатига қандай кириб қолгани номаълум.