Атлантикада 74 йил аввал ҳалокатга учраган самолёт қолдиқлари топилди
**74 йил аввал Атлантика океанида ҳалокатга учраган самолёт қолдиқлари топилди**
Аир/Сеа Ҳеритаге Фоундатион, Дееп Сеа Висион ва Диссоверй Чаннел телеканалининг "Эхпедитион Ункновн" ҳужжатли кўрсатуви тадқиқотчилари Атлантика океанига қулаган "Слиппер Эндеавор" (Доуглас ДС-4) самолётининг илк тасвирларини қўлга киритди. Пан Америсан Аирвайс авиакомпаниясига тегишли ушбу йўловчи самолёти 1952-йил 11-апрелда ўнг қанотидаги двигателлар ишдан чиққани сабабли ҳалокатга учраган эди. Бу ҳақда "Медуза" хабар берди.
Ўша куни "Слиппер Эндеавор" Пуерто-Рикодаги Исла-Гранде аеропортидан Ню-Ёркнинг Айдлвайлд аеропортига (ҳозирги Жон Ф. Кеннеди аеропорти) парвоз қилган. Самолёт етти йилдан бери эксплуатация қилинаётган бўлиб, капитан Жон С. Бёрннинг ўн йилдан ортиқ иш тажрибаси бор эди.
Парвоздан кўп ўтмай, 3-двигател тебрана бошлаган ва қувватини йўқотган. Капитан Бёрн самолётни аеропортга қайтаришга уринганида, 4-двигател ҳам ишдан чиққан. Иккала двигател ҳам ўнг қанотда жойлашган эди. Бёрн фавқулодда вазият сигналини бериб, сувга қўнишга тайёрлана бошлаган. Қирғоқ яқинидаги кучли шамол туфайли қўниш жуда оғир кечган. Самолётнинг дум қисми узилиб кетиб, у чўка бошлаган.
Сувга урилиш пайтида бортдаги барча йўловчилар омон қолган. Бироқ, улар қаттиқ қўрқиб кетган ва саросимага тушиб, ўриндиқларини маҳкам ушлаб олганча жойларидан туришдан бош тортган. Экипаж қутқарув солларини туширишга ва барча тирик қолганларни қутқарув нимчалари билан таъминлашга ҳаракат қилган. Аммо аксарият йўловчилар чўкаётган самолётни тарк этишни истамаган ва у билан бирга сув тубига чўккан. Бортдаги 69 кишидан фақат 17 нафари омон қолган.
Айнан ушбу ҳалокат авиация хавфсизлиги тизимида ислоҳотларга олиб келди. Хусусан, ушбу фожиадан сўнг борт кузатувчилари ҳар бир парвоздан олдин йўловчиларга фавқулодда вазиятда нима қилиш кераклигини тушунтиришни бошлади. Бу йўриқнома бугунги кунгача амал қилади. Борт кузатувчилари йўловчиларга самолётдан чиқиш жойларини, қутқарув нимчалари қаерда жойлашганини ва уларни қандай шиширишни кўрсатиб бериши шарт.
"Эхпедитион Ункновн" кўрсатуви ижодкорлари "Слиппер Эндеавор" қолдиқларини Пуерто-Риконинг шимолий қирғоқлари яқинида, 610 метр чуқурликда топди. Бунга чуқурликда самолёт фюзеляжи ва думини аниқлаган гидролокаторли дрон ёрдамида эришилди.
Экспедиция жамоаси илгари, 2024-йилда ҳам самолётни топишга уринган эди, аммо об-ҳаво шароити бунга имкон бермаган. 2026-йил 2-июн куни дрон Пан Америсан логотипи туширилган бўлакларни топди. Аввалроқ Багама оролларида Фламинго Аир авиакомпаниясининг Сессна 402С самолёти ҳалокатга учраши оқибатида бортдаги барча 10 киши ҳалок бўлгани ҳақида хабар берилганди.