“Арсенал” Винисиус Жуниор билан шахсий шартнома шартларини келишиб олди

"Арсенал" Винисиус Жуниор билан шахсий келишувга эришди

Лондоннинг "Арсенал" футбол клуби Мадриднинг "Реал" жамоаси ҳужумчиси Винисиус Жуниор билан шахсий шартнома шартлари бўйича келишувга эришди. Бу ҳақда "канонирлар"га оид янгиликларни ёритувчи ҲандофАрсенал саҳифаси маълум қилди.

Манбанинг хабар беришича, бразилиялик футболчининг агентлиги "Реал" раҳбарияти билан музокараларга киришади ва уларнинг қўлида "Арсенал" томонидан тайёрланган "улкан" таклиф мавжуд.

Аввалроқ ОАВда Лондон клуби 26 ёшли вингернинг трансфери учун 105 миллион фунт стерлинг (123 миллион евро) таклиф қилишга тайёрлиги ҳақида хабарлар тарқалган эди. Бироқ, "Реал" раҳбарияти ўз ҳужумчисининг эҳтимолий сотувидан тахминан 137 миллион фунт (160 миллион евро) ишлаб олмоқчи экани айтилмоқда.

Маълумот учун, Винисиус 2018-йилнинг ёзидан буён "қаймоқранглилар" шарафини ҳимоя қилиб келмоқда. Ўтган давр мобайнида бразилиялик вингер барча турнирларда жами 375 та ўйинда майдонга тушиб, 128 та гол ва 100 та голли узатмага муаллифлик қилган. Футболчининг Мадрид клуби билан амалдаги шартномаси 2027-йилнинг ёзига қадар мўлжалланган. Трансфермаркт портали маълумотларига кўра, ҳужумчининг ҳозирги трансфер баҳоси 140 миллион еврони ташкил этади.