АҚШ ва Исроил Эроннинг энергетика обьектларига зарба беришга ҳозирлик кўрмоқда
АҚШ ва Исроил Эроннинг энергетика инфратузилмаси обьектларига кенг кўламли бомбардимон ҳужумларини амалга оширишга тайёргарлик кўрмоқда. Бу ҳақда СБС Невс телеканалига хабардор манбалар маълум қилди.
Манбаларга кўра, ҳужумлар дам олиш кунлари бошланиши мумкин. Исроил бу ҳақда хабардор қилинган ва ўз ҳаракатларини АҚШ билан мувофиқлаштирмоқда. Бироқ, Доналд Трамп ҳужумлар учун якуний рухсатни ҳали бермаган.
Телеканалнинг қайд этишича, Трамп "қаттиққўл ёндашув" тарафдори бўлиб, яқинда Ҳормуз бўғозидаги ҳужумларга жавобан Эрон кўприклари ва электр стансияларини йўқ қилиш билан таҳдид қилган, аммо ҳали якуний буйруқни бермаган.
Ҳарбий экспертларнинг фикрича, электр стансиялари ва нефтни қайта ишлаш заводларига бериладиган зарбалар Эроннинг мамлакатни бошқариш ва армия эҳтиёжларини таъминлаш қобилиятига путур етказади.
"Айни пайтда Исроил кенг кўламли ҳарбий ҳаракатларни қайта бошлаш қарори ҳақида ҳеч нарсадан бехабар ва Исроилга Эронга қарши ҳар қандай ҳарбий ҳаракатларга қўшилиш сўрови билан мурожаат қилинмаган", деган Исроил расмийси СБС Невс телеканалига.
Ҳарбий зарба бериш режаси жума куни Трампнинг Кемп Девиддаги қароргоҳида маъмурият аъзолари билан ўтказилган йиғилишда муҳокама қилинган. Президентнинг сиёсий масалалар бўйича айрим ёрдамчилари бунга қатъиян қарши чиққан.
"Биз уларга жуда кучли зарбалар берамиз. Қачондир улар 'Бунга ортиқ чидай олмаймиз', дейишади", дея журналистларга баёнот берган Трамп.
"Президент Трамп Вазирлар маҳкамаси аъзолари йиғилишида айтганидек, Қўшма Штатлар ғалаба қозонади ва унинг бошқаруви даврида Эрон ядро қуролига эга бўлмайди", деди Оқ уй матбуот котиби Каролин Левитт телеканалга берган интервюсида.
Шу билан бирга, Пентагон матбуот котиби Шон Парнелл СБС Невс телеканалига идора президент якуний қарор қабул қилмагунча нишонлар юзасидан изоҳ бермаслигини маълум қилган.
Аввалроқ Покистон разведкаси АҚШ президенти Доналд Трамп ўз ҳарбийларининг огоҳлантиришларига қарамай, Эронга қарши қуруқликдан чекланган ҳужум уюштириш ҳақида буйруқ бериши мумкинлигини маълум қилганди.