Андижонда Траскеръга 21 нафар боғча боласини жойлаб, ЙТҲ содир этган аёлга суд ҳукми ўқилди

Андижонда Траскер автомобилига 21 нафар боғча ёшидаги болани жойлаб, йўл-транспорт ҳодисаси содир этган аёлга нисбатан суд ҳукми эълон қилинди.

“Дарё” нашри танишган суд ҳужжатларига кўра, ушбу воқеа 2026-йил 21-феврал куни тахминан соат 8:00 да Хўжаобод туманидаги Хўжаобод—Бобур транспорт йўлида юз берган.

Маълум бўлишича, 1986-йилда туғилган И.А. исмли аёл Ёшлар ишлари агентлигида иш юритувчи лавозимида фаолият юритган. У таниши Х.А. билан биргаликда давлат-хусусий шериклик асосида болалар боғчаси ташкил этган. Боғча расмий ҳужжатларда Х.А. номида бўлса-да, улар биргаликда фаолият юритишган. И.А. муассасада расман ишламаган, аммо ўз уйининг бир қисмини ижара шартномаси асосида боғча сифатида фойдаланишга берган. Боғча ҳар куни соат 07:00 дан 17:00 гача ишлаган.

Қоидаларга кўра, ота-оналар болаларини боғчага ўзлари олиб келиб, кечқурун қайтариб олиб кетишлари керак эди. Боғчанинг тарбияланувчиларни уйларидан йиғиб келиш учун алоҳида транспорт воситаси бўлмаган.

Шунга қарамай, И.А. ота-оналарга қулайлик яратиш мақсадида болаларни шахсий автомобилида уйларидан йиғиб, боғчага олиб келган ва иш вақти тугагач, уларни яна уйларига етказиб қўйган.

Воқеа содир бўлган куни ҳам у соат 08:00 га қадар 21 нафар болани уйларидан йиғиб, боғча томон йўлга чиққан. Болалар автомобил салонининг олд ва орқа қисмига, айримлари эса юкхона қисмига жойлаштирилган.

И.А. ўз кўрсатмасида шундай деган: “Нурбулоқ кўчасидан ўтган иккинчи даражали йўлнинг ўнг қаторида ҳаракатланаётганимда, чап томонимдан русуми аниқланмаган автомобил катта тезликда ўтиб кетди. Машинамга жуда яқинлашгани учун қўрқиб кетиб, беихтиёр рулни ўнг томонга буриб юбордим. Натижада Траскер йўл четидан чиқиб, бошқарувни бутунлай йўқотдим ва бетон ёритиш устунига бориб урилдим”.

Автомашина устунга қаттиқ урилиши натижасида унинг орқа қисми бурилиб кетган. Олд йўловчи ўриндиғида ўтирган уч нафар бола зарба таъсирида олдинга силжиган. Шундан сўнг И.А. йиғлаб, атрофдагилардан ёрдам сўраган. Одамлар уни ва болаларни машинадан чиқариб, туман шошилинч тиббий ёрдам бўлимига олиб борган.

Юз берган йўл-транспорт ҳодисаси оқибатида 6 ёшли М. исмли қизалоқ оғир тан жароҳати олган. Шифокорларнинг саъй-ҳаракатларига қарамасдан, қизалоқ тўрт кундан сўнг шифохонанинг жонлантириш бўлимида вафот этган.

Шунингдек, яна бир нафар бола ўрта оғир, олти нафар бола эса енгил тан жароҳати олган.

Судланувчи судда айбига иқрор бўлиб, ҳақиқатан ҳам йўл ҳаракати қоидаларига риоя қилмаганини ва белгиланган талабдан ортиқ йўловчини автомобилида олиб юрганини билдирган. Шунингдек, M.ning дафн маросимларига имкони даражасида моддий ёрдам кўрсатганини, қилмишидан пушаймонлигини ва иккинчи гуруҳ ногирони эканини айтиб, жазо тайинлашда енгиллик беришни сўраган.

Жиноят ишлари бўйича Хўжаобод туман суди И.A.ni Жиноят кодексининг 266-моддаси 2-қисми (Транспорт воситалари ҳаракати ёки улардан фойдаланиш хавфсизлиги қоидаларини бузиш) билан айбдор деб топган. Унга нисбатан 2 йил муддатга муайян ҳуқуқдан, яъни транспорт воситаларини бошқариш ҳуқуқидан маҳрум қилинган ҳолда 3 йил муддатга уй-жойини тарк этишни тўлиқ тақиқлаш тарзида озодликни чеклаш жазоси тайинланган.

Аввалроқ Хоразмда одам ўлими билан боғлиқ ЙТҲ содир этган профилактика инспектори қамалган эди. Самарқандда велосипеддан йиқилган 14 ёшли қизни босиб кетган юк машинаси ҳайдовчиси 6 йилга қамалган.