Андижонда 21 нафар боғча боласини ташиган Траскер ЙТҲга учраб, 6 ёшли қиз вафот этди. Ҳайдовчига уй қамоғи жазоси берилди
Хўжаобод туманида 21 нафар боғча боласини Траскеръда олиб кетаётган ҳайдовчи ЙТҲ содир этди. Оқибатда 6 ёшли қизалоқ ҳалок бўлиб, яна 7 нафар бола турли даражада жароҳат олди. Суд 3 йил муддатга озодликни чеклаш ҳамда 2 йилга транспорт воситаларини бошқариш ҳуқуқидан маҳрум қилиш жазосини тайинлади.
Андижонда 21 нафар боғча боласи бўлган Траскер автомобили иштирокидаги йўл-транспорт ҳодисаси (ЙТҲ) оқибатида 6 ёшли қизча ҳалок бўлди. Ҳайдовчига уй қамоғи жазоси тайинланди.
"Газета" нашри Андижон вилояти Хўжаобод туманида содир бўлган ушбу ЙТҲ ва унинг ортидан ўтказилган суд жараёнини ўрганди. Суд ҳужжатларига кўра, воқеа 2026-йил 21-феврал куни эрталаб юз берган. Ўша куни ҳайдовчи И.А. ўзининг Траскер автомобилида хусусий мактабгача таълим муассасасининг 21 нафар вояга етмаган тарбияланувчисини боғчага олиб кетаётган бўлган.
Суд автомобил ҳайдовчиси Йўл ҳаракати қоидаларининг бир қатор талабларини қўпол равишда бузганини аниқлади. Хусусан, у болаларни ташишга мўлжалланмаган транспорт воситасида белгиланганидан ортиқ йўловчи билан ҳаракатланган, болалар гуруҳи учун мажбурий кузатувчи ва махсус белгилар бўлмаган, шунингдек, транспорт воситасининг техник имкониятидан ортиқ одам олиб кетилган.
Ҳаракат вақтида ҳайдовчи автомобил бошқарувини йўқотиб, йўл четидаги бетон устунга урилган. Натижада 6 ёшли М.Х. оғир тан жароҳати олиб, шифохонада вафот этган. Яна етти нафар бола енгил ва ўрта оғир тан жароҳатлари олган.
Суд мажлисида Иродахон Абдиразакова айбига иқрор бўлди. Унинг сўзларига кўра, боғча расман бошқа шахс номида бўлса-да, у шериги билан биргаликда ундан фойдаланган. "Боғчанинг болаларни уйидан олиб келиш учун алоҳида транспорти йўқ эди. Ота-оналарга қулайлик яратиш мақсадида уларни ўзимнинг машинамда олиб келиб, кейин уйларига қайтариб қўярдим", — деди у суд мажлисида.
Судланувчи воқеа куни ҳам болаларни уйларидан йиғиб келаётганини билдириб, ЙТҲ қандай содир бўлганини қуйидагича тушунтирди: "Чап томонимдан катта тезликда бир автомобил ўтиб, машинамга жуда яқинлашиб кетди. Шундан чўчиб, билмаган ҳолда рулни ўнг томонга буриб юбордим. Машина йўл четига чиқиб кетди ва бошқарувни бутунлай йўқотиб, бетон устунга урилди". У шунингдек, "Машинамга 21 нафар болани, жумладан салоннинг олди, орқа қисми ва ҳатто багажига ҳам чиқарганман. Қилган ишимдан пушаймонман", — дея қўшимча қилди.
Судланувчи марҳуманинг дафн маросимига моддий ёрдам берганини, ИИ гуруҳ ногирони эканини ҳам маълум қилиб, суддан енгиллик сўради.
Судда сўроқ қилинган жабрланувчиларнинг қонуний вакиллари фарзандлари айнан И.А. томонидан ҳар куни уйидан боғчага олиб кетилганини тасдиқлади. Ҳалок бўлган қизалоқнинг онаси қизи воқеадан сўнг тўрт кун реанимацияда ётиб, кейин вафот этганини айтди. Бироқ у ҳам, бошқа жабрланувчиларнинг ота-оналари ҳам судланувчига нисбатан моддий ёки маънавий даъвоси қолмаганини, етказилган зарар қопланганини ва унга қонуний енгиллик беришни сўрашди.
Суд И.A.ni Жиноят кодексининг 266-моддаси 2-қисми (Транспорт воситалари ҳаракати ёки улардан фойдаланиш хавфсизлиги қоидаларини бузиш одам ўлимига сабаб бўлиши) билан айбли деб топди. Жазони тайинлашда суд унинг аёллиги, айбига иқрор бўлгани, чин кўнгилдан пушаймонлиги, илгари судланмагани, етказилган зарарни қисман қоплагани, жабрланувчиларнинг даъвоси йўқлиги, эҳтиёцизлик оқибатида жиноят содир этилгани каби ҳолатларни инобатга олиб, Жиноят кодексининг 57-моддасини (Енгилроқ жазо тайинлаш) қўллади.
Натижада суд унга 3 йил муддатга уй-жойини у ёки бу сабаб билан тарк этишни бутунлай тақиқлаш тарзидаги озодликни чеклаш жазоси ва 2 йил муддатга транспорт воситаларини бошқариш ҳуқуқидан маҳрум қилиш жазосини тайинлади. Шунингдек, судланувчига назорат органи рухсатисиз яшаш жойини ўзгартирмаслик ҳамда Андижон вилояти ҳудудидан ташқарига чиқмаслик мажбурияти юклатилди.
Болалар боғчалари тарбияланувчиларини хавфсизлик қоидаларини бузган ҳолда 4−7 ўринли автомобилларда ташиш Ўзбекистонда анча кенг тарқалган амалиётдир. Май ойида Нурота туманида 14 нафар боғча боласи бўлган Матиз ҳалокатга учрагани хабар қилинганди. Рулда ҳайдовчилик гувоҳномаси олмаган оилавий боғча раҳбари бўлган. Ҳодиса оқибатида аёл вафот этган, болалар турли тан жароҳатлари билан шифохонага етказилган.
Шундан сўнг ЙҲХХ 1−8-май кунлари болаларни транспортда меъёрдан ортиқ ташиш билан боғлиқ 125 та ҳолатни аниқлаган. Идора ахборот хизмати раҳбари Зойир Йўлдошевга кўра, айрим ҳолатларда Дамасъларда 25−28 нафаргача, Спарк автомобилларида эса 18 нафаргача бола ташилган. Таъкидлаш жоизки, бундай қоидабузарликнинг оғир оқибатлари ҳақида мунтазам хабар ва огоҳлантиришлар бериб келинаётгани ва назорат тадбирлари ўтказилаётганига қарамай, йўлларда болалар ҳаётини хавфга қўйиб, уларни сиғимдан ортиқ ташиш ҳолатлари тез-тез учраб туради.