«25 млн бер, ҳайдовчилик гувоҳноманг ҳал...» — Бухорода яна бир фириб фош этилди
Гумонланувчи ижтимоий тармоқ орқали фуқарога 3 ойлик ўқув курсини тамомлагани ҳақида сертификат ва «Б», «С»
«25 миллион сўм берсанг, ҳайдовчилик гувоҳноманг тайёр бўлади...» — Бухорода яна бир фирибгарлик ҳолати фош этилди.
Бухоро вилоятида 25 миллион сўм эвазига ҳайдовчилик гувоҳномасини олиб беришни ваъда қилган шахс қўлга олинди. Бу ҳақда Бухоро вилояти ИИБ Кибержиноятларга қарши курашиш бошқармаси масъули «Xabar.uz»га маълум қилди.
Жиноят Бош прокуратура ҳузуридаги Департаментнинг Ғиждувон туман бўлими билан ҳамкорликда ўтказилган тезкор-қидирув тадбири давомида аниқланган.
Маълумотларга кўра, гумонланувчи ижтимоий тармоқ орқали фуқаронинг ишончига кириб, унга 3 ойлик ўқув курсини тугатганлиги ҳақида сертификат ҳамда «Б» ва «С» тоифали ҳайдовчилик гувоҳномасини олиб беришни ваъда қилган.
У ушбу масалани Бухоро, Навоий ва Қарши шаҳарларидаги имтиҳон марказларида ишловчи танишлари орқали бир ҳафта муддатда ҳал қилиб беришга ишонтирган. Ушбу ноқонуний хизмати учун фуқародан 25 миллион сўм талаб қилган.
Шахс Бухоро шаҳридаги Қаюм Муртазоев кўчасида келишилган пулни олаётган вақтида ҳуқуқни муҳофаза қилувчи органлар ходимлари томонидан қўлга олинган.
Мазкур ҳолат юзасидан гумонланувчига нисбатан Жиноят кодексининг тегишли моддалари билан жиноят иши қўзғатилган.
У судда ўзига ишонган фуқарога: «25 миллион бер, ҳайдовчилик гувоҳноманг масаласи ҳал. Ҳеч қандай муаммо чиқмайди. Одамларим ишончли», — деб айтганини тан олган.
Ҳозирда унинг бошқа жиноятларга алоқадорлигини аниқлаш юзасидан тергов ҳаракатлари давом эттирилмоқда.