“Özbekneftgaz” Buxoro NQIZni modernizatsiya qilib, benzin işlab çiqarişni oşirmoqçi
Buxoro neftni qayta işlaş zavodida yuqori oktanli benzin işlab çiqariş rejalaştirilmoqda. Modernizatsiya import prisadkalariga ehtiyojni kamaytirişi kutilmoqda.
“Özbekneftgaz” Buxoro NQIZni modernizatsiya qilib, benzin ishlab chiqarishni oshirmoqchi
“Özbekneftgaz” yuqori oktanli avtomobil benzinini bevosita neftni qayta ishlash jarayonida ishlab chiqarishni yo‘lga qo‘yish maqsadida Buxoro neftni qayta ishlash zavodini modernizatsiya qilishni rejalashtirmoqda.
Bu tayyor yoqilg‘ining oktan sonini oshirish uchun ishlatiladigan import prisadkalardan voz kechish imkonini beradi.
Davlat kompaniyasi boshqaruvi raisining birinchi o‘rinbosari Suxrob Hamrayev modernizatsiya rejalari haqida 27 oktyabr kuni bo‘lib o‘tgan matbuot anjumanida ma’lum qildi.
Uning so‘zlariga ko‘ra, loyihaning texnik-iqtisodiy asosi allaqachon tayyorlangan. Tashabbus oktyabr oyidagi yig‘ilishda Prezident tomonidan ma’qullangan, shuningdek, Kompleks ekspertiza markazining ijobiy xulosasini olgan. Hozirda uni tegishli hukumat qarori bilan tasdiqlash bo‘yicha ishlar olib borilmoqda.
Hamrayev ta’kidlashicha, TIA tasdiqlanib, Prezident qarori qabul qilinganidan keyin modernizatsiya ishlari joriy yilning to‘rtinchi choragida yoki 2027 yilda boshlanishi mumkin.
Loyihani amalga oshiruvchilar ochiq tender orqali tanlanishi rejalashtirilgan. Unda litsenziya egalari, qurilish tashkilotlari va o‘z takliflarini taqdim etishga tayyor boshqa ehtimoliy pudratchilar ishtirok etishi mumkin.
Loyihani amalga oshirish uchun mablag‘larning bir qismini kredit moliyalashtiruvi orqali jalb qilish ko‘zda tutilgan. Kompaniya vakilining ta’kidlashicha, tender va hukumat qarori haqidagi ma’lumotlar ochiq bo‘ladi.
“Özbekneftgaz” boshqaruvi raisining qayta ishlash masalalari bo‘yicha o‘rinbosari Abrorjon Xudoyberganov Buxoro NQIZ hozirda ishlab chiqarish imkoniyatlarining eng yuqori chegarasida faoliyat yuritayotganini ma’lum qildi.
Uning so‘zlariga ko‘ra, kompaniya yetkazib berish rejasini to‘liq bajarmoqda, iste’molchilarga sotish uchun mo‘ljallangan avtomobil benzini zaxiralari esa 125 ming tonnadan oshgan.
Xudoyberganov prisadkalarning yoqilg‘i tannarxiga ta’siriga ham e’tibor qaratdi. Benzinning oktan sonini oshirish uchun ulardan foydalanish ishlab chiqarish xarajatlarini ko‘paytiradi.
Korxona rekonstruksiya qilinib, yangi mahsulotlar ishlab chiqarish hajmi kengaytirilganidan so‘ng ularning tannarxi, binobarin, benzin narxi ham pasayishi kutilmoqda.