Zimbabvelik magnat Uiknell Chivayo va uning rafiqasi vertolyot halokatida halok boʻldi

Zimbabvelik magnat Uiknell Chivayo va uning rafiqasi vertolyot halokatida halok boʻldi

Uiknell Chivayo oʻzining hashamatli hayot tarzi bilan tanilgan mashhur tadbirkor edi

Zimbabvelik taniqli tadbirkor Uiknell Chivayo va uning rafiqasi olti kishining umriga zomin boʻlgan vertolyot halokatida vafot etdi, buni uning oilasi tasdiqladi.

Vertolyot chorshanba kuni kechqurun poytaxt Xararedan taxminan 70 km (43 mil) sharqda joylashgan Marondera qishloq hududida qulab tushgan. Politsiya havo kemasi bortidagi barcha halok boʻlganini maʼlum qildi.

Oila vakili Herbert Chivayo ZBC davlat telekanaliga tadbirkor va uning rafiqasi Lyusi Muteke halok boʻlganini tasdiqladi va oila ushbu fojiadan qaygʻuda ekanini aytdi.

Chivayo oʻzining hashamatli hayot tarzi, bir nechta Afrika prezidentlari bilan yaqin aloqalari va qayta-qayta tekshiruvga sabab boʻlgan serdaromad davlat shartnomalari bilan tanilgan edi.

U oʻz tadbirkorlik faoliyati bilan bogʻliq qonunbuzarlik ayblovlarini rad etgan.

Politsiya vakili, komissar Pol Nyatining aytishicha, havo kemasi mahalliy vaqt bilan taxminan 17:00 da (Grinvich boʻyicha 15:00) qulab tushgan va bortida olti kishi boʻlgan, biroq rasmiylar ularning barchasini darhol nomma-nom maʼlum qilmagan. Hukumat rasmiylarining bildirishicha, olti kishidan ikki nafari uchuvchi boʻlgan.

ZBC xabariga koʻra, guruh Chikombadagi Gandamidan — Chivayo va uning rafiqasi qishloq uyi qurayotgan joydan kelayotgan boʻlgan va vertolyot havoga koʻtarilganidan taxminan 40 daqiqa oʻtgach, Kudenga fermasida qulab tushgan.

«Ushbu fojiali xabardan keyin soʻz topolmay qoldik», dedi oila vakili ZBC telekanaliga.

Halokat sabablari darhol maʼlum boʻlmadi, politsiya tergov harakatlari olib borilayotganini bildirdi. Chorshanba kuni kechqurun voqea joyiga favqulodda vaziyatlar xizmatlari yuborilgan.

Avvalroq hukumat vakili Nik Mangvana halokatni tasdiqlab, vertolyotda «taniqli tadbirkor, yana uch nafar yoʻlovchi va ikki uchuvchi» boʻlganini aytgan edi.

«Hozirgi maʼlumotlarga koʻra, ushbu halokatda omon qolganlar yoʻq», deb yozdi Mangvana X ijtimoiy tarmogʻida.

Chivayo «Intratrek Zimbabwe» kompaniyasining bosh direktori boʻlgan va davlat shartnomalari, xayriya ishlari hamda ijtimoiy tarmoqlarda boyligini koʻrsatishi orqali keng jamoatchilikka tanilgan edi.

Uning eng mashhur biznes loyihalaridan biri Gvandadagi 172 million dollarlik (128 million funt sterling) quyosh energiyasi loyihasi boʻlib, u davlatga qarashli «Zimbabwe Power Company» tomonidan «Intratrek» kompaniyasiga topshirilgan edi. Keyinchalik bu loyiha koʻp yillik sud nizolari mavzusiga aylandi.

Shuningdek, u Zimbabveda 2023 yilda oʻtgan bahsli saylovlar uchun materiallar xarid qilinishi boʻyicha ham tekshiruvga duch kelgan edi. Zimbabve korruptsiyaga qarshi kurashish komissiyasi Janubiy Afrikaning «Ren-Form» kompaniyasiga berilgan shartnomalar bilan bogʻliq ayblovlarni oʻrgandi, biroq 2025 yilda Chivayo yoki Zimbabve saylov komissiyasini qonunbuzarlikka aloqador qiluvchi dalillar topmaganini aytib, surishtiruvni yopdi.

Chivayo, shuningdek, musiqachilar, diniy yetakchilar va boshqa jamoat arboblariga hashamatli mashinalar va katta miqdordagi pullarni sovgʻa qilishi, ushbu sovgʻalarni tez-tez ijtimoiy tarmoqlarda ulashishi bilan ham tanilgan edi.

Uning aloqalari Zimbabve bilangina cheklanib qolmagan.

Ilgari Chivayo bilan birga jamoatchilik oldida koʻrinish bergan Keniya Prezidenti Uilyam Ruto uni «qadrdon doʻstim» deb atadi va halok boʻlganlarning oila aʼzolariga hamdardlik bildirdi.

«Men uni doʻstligi, gʻayrati va qitʼamizning imkoniyatlariga boʻlgan chuqur ishonchi bilan eslab qolaman», deya qoʻshimcha qildi Ruto.

U Afrika yetakchilari bilan uchrashish imkoniyatiga ega ekanini tez-tez namoyish qilib, Zambiya Prezidenti Xakainde Xichilema, Janubiy Afrika Prezidenti Siril Ramafosa va Tanzaniya Prezidenti Samiya Suluxu Xasan, shuningdek, Esvatini Qiroli Msvati III kabi rahbarlar bilan uchrashuvlaridan olingan suratlarni joylashtirib borar edi.