Zelenskiy Tramp bilan telefon orqali muloqot qildi
Ukraina prezidenti Volodimir Zelenskiy AQSH prezidenti Donald Tramp bilan telefon orqali muloqot qilib, Nyu-Yorkda uchrashishga kelishib olganini bildirdi. Zelenskiyga koʻra, rejalashtirilayotgan muzokara Ukrainadagi urushni tinch yoʻl bilan tugatish jarayonida «koʻp narsani oʻzgartirishi mumkin».
Zelenskiy Tramp bilan telefon orqali gaplashdi
Ukraina prezidenti Volodimir Zelenskiy Donald Tramp bilan Nyu-Yorkda uchrashishni rejalashtirayotganini bildirdi. Bu haqda u 20-sentabr, yakshanba kuni AQSH prezidenti bilan telefon muloqotidan so‘ng Telegram kanalida yozdi.
Zelenskiyning aytishicha, ikki davlat rahbarlari Nyu-Yorkda yuzma-yuz uchrashishga kelishib olgan. Ukraina prezidenti bu suhbat tinchlik jarayoni nuqtai nazaridan muhim bo‘lishini va «ko‘p narsani o‘zgartirishi mumkin»ligini ta’kidladi.
Shu bilan birga, Zelenskiy uchrashuv aynan qaysi kuni bo‘lishini oshkor etmadi. Donald Tramp ham xabar e’lon qilingan paytga qadar Nyu-Yorkda Ukraina prezidenti bilan uchrashish rejasini rasman tasdiqlamagan edi.
Telefon suhbatida Zelenskiy AQSH prezidentining maxsus vakillari Stiven Uitkoff va Jared Kushnerning Kiyevga yaqinda qilgan tashrifi uchun Trampga minnatdorlik bildirdi.
Ukraina prezidentining so‘zlariga ko‘ra, Amerika vakillari bilan uchrashuvda muhim masalalar batafsil muhokama qilingan va ular Ukrainadagi vaziyatni bevosita ko‘rish imkoniga ega bo‘lgan.
Zelenskiy Ukrainadagi urushni tinch yo‘l bilan yakunlash bo‘yicha muzokaralar Kiyev uchun birinchi darajali ustuvor yo‘nalish ekanini qayd etdi.
Shuningdek, Ukraina rahbari Rossiyaga nisbatan sanksiya bosimini kuchaytirish imkonini beruvchi «Lindsi Grem qonuni»ni imzolagani uchun Trampga minnatdorlik bildirdi.
Zelenskiyning ma’lum qilishicha, Kiyevda vaziyatni yumshatish va xavfsizlikning asosiy masalalari bo‘yicha bir qator takliflar mavjud. Ular energetika va oziq-ovqat xavfsizligi hamda insonlar hayotini himoya qilishga doir choralarni o‘z ichiga oladi.
«Biz Amerika jamoasi bilan birgalikda ishlayapmiz va haqiqatan ham jiddiy qadamlar tashlashga tayyormiz», - dedi Ukraina prezidenti.
Uitkoff va Kushner 6-sentabr kuni Kiyevda Zelenskiy bilan uchrashgan edi. Bu Donald Trampning ikkinchi prezidentlik muddati boshlanganidan keyin uning maxsus vakillarining Ukrainaga ilk tashrifi bo‘ldi.
Amerika vakillari Kiyevga kelishidan bir kun oldin, 5-sentabrda Moskvada Rossiya prezidenti Vladimir Putin bilan uch soatlik muzokara o‘tkazgan.