Zelenskiy Rossiyaga uzoq masofali zarbalar kengaytirilishini eʼlon qildi
Ukraina Rossiyaga uzoq masofali zarbalar berish strategiyasini kengaytirmoqchi. Zelenskiy yangi operatsiyalar rejalashtirilganini aytdi, ammo ularning nishonlari va muddatini ochiqlamadi.
Zelenskiy Rossiyaga uzoq masofali zarbalar kengaytirilishini maʼlum qildi
Ukraina harbiy rahbariyati «Rossiyaning hujumlariga javoban uzoq masofali qurollardan foydalangan holda» yangi operatsiyalarni kelishib oldi. Bu haqda mamlakat prezidenti Volodimir Zelenskiy Ukraina Qurolli kuchlari bosh qoʻmondoni Mixail Drapatiy va mudofaa vaziri Yevgeniy Xmara bilan uchrashuvdan keyin aytdi.
«Uzoq masofalarga zarba berish imkoniyatlarimizni kengaytirishga tayyorgarlik koʻryapmiz,» - dedi Ukraina rahbari.
Yil boshidan buyon UQK Rossiyaning yoqilgʻi-energetika majmuasi obyektlariga zarbalarni kuchaytirdi. Sentabrga kelib Ukraina dronlari neftni qayta ishlash zavodlariga kamida 70 marta zarba berdi, buning natijasida mamlakatda neftni qayta ishlash hajmi soʻnggi yigirma yildagi eng past darajaga tushdi, bu esa benzinning keskin tanqisligi va yoqilgʻi quyish shoxobchalarida cheklovlar joriy etilishiga olib keldi. Bundan tashqari, Ukraina Qurolli kuchlari harbiy zavodlar, port infratuzilmasi va yashirin flot kemalariga ham zarbalar bermoqda.
Avvalroq Ukraina bir necha oy davomida Rossiya bilan energiya obyektlari, portlar va boshqa muhim infratuzilmalarga zarbalar borasida oʻzaro tanaffusga erishishga urinib kelgan edi. Ammo Putin bu tashabbusni rad etdi va aksincha hujumlarni kuchaytirdi. «Nega bu taklif berilayotgani tushunarli, chunki Ukraina hududi ichkarisiga berayotgan javob zarbalarimiz kuchliroq, sezgirroq va toʻgʻrisini aytganda, vayronkorroqdir» - dedi u.
Putin Rossiyaning neft-gaz infratuzilmasi, marketpleyslar omborlari va savdo kemalariga qilingan hujumlar «muammolar tugʻdirishi» va zarar yetkazishini tan oldi, biroq UQK harakatlaridan «jiddiy oqibatlar» yoʻqligini taʼkidladi.