Zelenskiy 15 kishining umriga zomin boʻlgan Rossiyaning «jirkanch» keng koʻlamli hujumlarini qoraladi
Priluki shahrida koʻp kvartirali uy vayron boʻlganidan keyin qutqaruvchilar aholini qidirish ishlarini davom ettirmoqda.
Zelenskiy 15 kishining umriga zomin boʻlgan Rossiyaning «jirkanch» keng koʻlamli hujumlarini qoraladi
Ukraina markazi va sharqiga tungi zarbalar oqibatida kamida 15 kishi halok boʻldi, Vladimir Zelenskiy buni Rossiyaning «eng jirkanch» hujumlaridan biri deb taʼrifladi.
Ukraina prezidentining aytishicha, Chernigov viloyatining Priluki shahridagi turar-joy binosi chorshanba kuni 74 yoshga toʻladigan «Putinga tugʻilgan kun «sovgʻasi» sifatida vayron qilingan. Zarbalar Kiyev, Dnepr, Kremenchug, Zaporojye va Aleksandriyaga ham berilgan.
Zelenskiy Ukraina soʻnggi 24 soat ichida Rossiyaning Perm, Samara va Astraxan viloyatlaridagi nishonlarga zarba berganini aytdi va batafsil maʼlumot bermasdan, «Qora dengizda ham javob boʻlganini» qoʻshimcha qildi.
Moskva soʻnggi zarbalar yuzasidan hali izoh bermadi.
«Ruslar ogʻriqli va namoyishkorona zarba berishni xohlashdi», dedi Zelenskiy va jami 70 ta raketa otilganini qoʻshimcha qildi.
Chorshanba kuni ertalab ijtimoiy tarmoqdagi postida Zelenskiy Prilukidagi besh qavatli turar-joy binosiga berilgan zarba oqibatida besh kishi halok boʻlgani va 26 kishi, jumladan besh nafar bola yaralanganini maʼlum qildi.
U vayronalar ostida hali ham odamlar qolib ketgan boʻlishi mumkinligini qoʻshimcha qildi.
Keyinroq Chernigov viloyati politsiyasi uch nafar bolaning jasadi topilganidan keyin qurbonlar soni toʻqqiz kishiga yetganini, favqulodda vaziyatlar xodimlari qidiruv-qutqaruv ishlarini davom ettirayotganini maʼlum qildi.
Zelenskiyning soʻzlariga koʻra, Rossiya raketa zarbalari Dneprdagi beshta turar-joy binosi va Kremenchugdagi toʻrtta koʻp qavatli binoga shikast yetkazgani oqibatida ikki kishi halok boʻlgan va sakkiz kishi yaralangan.
Poytaxt Kiyevda ham ikki kishi, Aleksandriyada esa yana ikki kishi halok boʻlgan, deya qoʻshimcha qildi u.
Ukraina milliy politsiyasi internetda Kiyev tumanlaridan birining oʻrtasida portlamay qolgan Rossiyaning «Iskander» raketasi aks etgan suratlarni joylashtirdi.
Zelenskiy ittifoqchilarini Ukrainaga havo hujumidan mudofaa tizimlarini qoʻllab-quvvatlash paketlarini taqdim etishga yana bir bor chaqirib, mamlakat harbiylari Rossiya tomonidan tunda uchirilgan raketalarning faqat «bir qismini» urib tushirishga muvaffaq boʻlganini aytdi.
Zelenskiyning soʻzlariga koʻra, hujumning «asosiy nishonlaridan» biri mamlakat energetika infratuzilmasi boʻlgan. Avvalroq Moskva Ukrainaning Rossiya energetika obʼyektlariga bergan zarbalaridan keyin ushbu infratuzilmaga hujumlarni kuchaytirishini bildirgan edi.
Chorshanba kungi boshqa bir postida Zelenskiy Ukraina soʻnggi 24 soat ichida javob zarbalari sifatida toʻrtta nishonga, jumladan Perm, Samara va Astraxan viloyatlaridagi ikkita neft obʼyekti va poligonga zarba berganini aytdi.
«Qora dengizda ham javob bor», deb yozdi Ukraina prezidenti.
Seshanba kuni kechqurun Rossiya janubidagi Qora dengiz boʻyida joylashgan Sochi qirgʻoqlari yaqinida neft tankerini ulkan tutun buluti qoplagani aks etgan videolavhalar paydo boʻldi.
Rossiya Transport vazirligi keyinroq uchuvchisiz qayiqlar Liberiya bayrogʻi ostidagi «Aframax Rio» neft tankeriga hujum qilganini maʼlum qildi.
Bu voqea Rossiyaning Ukrainaga qarshi urushi doirasida Qora dengizda, ayniqsa uning sharqiy qismida zarbalarni kuchaytirayotgan bir paytda yuz berdi.
Seshanba kungi kechki murojaatida Zelenskiy hujumlar uchun Rossiya javobgar ekanini daʼvo qildi.
Moskva soʻnggi hodisa yuzasidan izoh bermadi.