Yunusobod aholisi Energetika vazirligining vaʼdalarini chidamlilikka tekshirib koʻrib, qoʻpol iboralar xazinasini tugatishdi

Yunusobod aholisi Energetika vazirligining vaʼdalarini sinovdan oʻtkazib, achchiq soʻzlar zaxirasini tugatib boʻlganga oʻxshaydi

Oʻzbekiston Energetika vazirligi kuz-qish mavsumi elektr taʼminotida uzilishlarsiz oʻtishini maʼlum qildi. Biroq bir shart bilan: rejali taʼmirlash ishlari zarur boʻlgan taqdirda, qisqa muddatli oʻchirishlar baribir yuz berishi mumkin. Idoraning tushuntirishicha, bular eskirgan uskunalarni yangilash va elektr tarmoqlari infratuzilmasini modernizatsiya qilish uchun zarur.

Bu umidbaxsh tuyuladi. Ammo Yunusobodning ikkita — oltinchi va yettinchi dahalari aholisi elektr taʼminotidagi vaziyatga qarab, yigʻlashini yoki kulishini bilmay qolganga oʻxshaydi. Bu yerda, shekilli, rejali taʼmirlashlar va avariyaviy oʻchirishlar allaqachon kundalik hayotning bir qismiga aylanib boʻlgan.

Mahalliy aholining soʻzlariga koʻra, bu yerda chiroq oʻchmaydigan hafta deyarli boʻlmaydi. Sababi — «Beshqoʻrgʻon» va «Yablochniy» podstantsiyalarida tez-tez yuz berayotgan avariyalardir. Baʼzan elektr energiyasi sutkasiga ikki-uch martalab oʻchiriladi. Hatto bayram kunlari ham bundan mustasno emas: aholi 1 sentyabrda ham, 1 oktyabrda ham chiroqsiz qolgan edi.

Tuman elektr tarmoqlarining (TET) mahalliy guruhlarda eʼlon qilinadigan xushmuomalalik bilan soʻralgan uzrlari hech narsani oʻzgartirmayapti. Bundan odamlarning xonadoni yorishib qolmaydi va koʻngli taskin topmaydi: maishiy texnikadan ajralib qolish xavfi bor, odatiy hayot tarzi buziladi, navbatdagi oʻchirish haqidagi xabar esa faqat gʻazabni oshiradi, xolos.

Vaholanki, hali 2023 yildayoq aholiga ozgina sabr qilish kerakligi va elektr taʼminotidagi muammolar oʻtmishda qolishi vaʼda qilingan edi.

Aynan oʻshanda Toshkentning ushbu tumanida havodagi yuqori kuchlanishli elektr uzatish tarmoqlarini yer osti kabel tarmoqlariga almashtirish boʻyicha keng koʻlamli ishlar boshlangan edi. Ishlar anomal sovuq qishdan soʻng poytaxt energetika tizimini modernizatsiya qilish boʻyicha shoshilinch dastur doirasida olib borilgandi.

Elektr tarmoqlarini yer ostiga oʻtkazish infratuzilmani kuchli shamol va yogʻingarchiliklardan himoya qilishi, avariyalarni kamaytirishi va zoʻriqish bilan ishlayotgan podstantsiyalarga tushayotgan yukni yengillashtirishi kerak edi.

Biroq, davom etayotgan oʻchirishlardan koʻrinib turibdiki, aholi kutilgan natijani sezmadi. Ularning soʻzlariga koʻra, avariyalar tobora tez-tez sodir boʻlmoqda, elektrdagi uzilishlar esa asta-sekin chorasizlik sifatida qabul qilinmoqda.

Oʻtkazilgan modernizatsiyadan soʻng nega vaziyat yaxshilanmagani tushunarsiz boʻlib qolmoqda.

Energetika vazirligi maʼlumotlariga koʻra, fuqarolarning bevosita elektr taʼminotidagi uzilishlar boʻyicha murojaatlari soni 49,7 foizga — 14 mingtagacha kamaygan.

Idoraviy statistika uchun bu, shubhasiz, ijobiy koʻrsatkich. Ammo Yunusobodning ikki dahasi aholisiga bundan hech qanday yengillik yoʻq. Agar elektr energiyasi ilgarigidek muntazam ravishda oʻchib tursa, shikoyatlarning umumiy soni kamayganining oʻzi muammoni hal qilmaydi.

Odamlarni energetiklarning hisobotlari va xushmuomalalik bilan soʻragan uzrlari tashvishga solmaydi. Ularga chiroq kerak — kutilmagan oʻchirishlarsiz, buzilgan maishiy texnikalarsiz va har safar elektr uzatish qachon tiklanishini surishtirish zaruratisiz.

Oldinda turgan qishdan betalafot oʻtish haqidagi vaʼdalar fonida savollar avvalgidek ochiq qolmoqda: nega avariyalar bir xil hududlarda takrorlanaveradi, oʻtkazilgan modernizatsiya nima berdi va aholi qachon barqaror elektr taʼminotiga umid qila oladi?

Hozircha esa bosh energetika idorasi shuni yodda tutishi kerak: tizimning ishonchliligi haqidagi ishonchli bayonotlar faqat rozetkalarda oʻz tasdigʻini topgandagina ishonarli yangraydi.