Yillar davomida kutilgan eng katta Boeing 737 MAX’ga ruxsat berildi
AQSH Federal aviatsiya maʼmuriyati - FAA Boeing 737 MAX 10 samolyotidan foydalanishga yakuniy ruxsat berdi. Bu 230 nafargacha yoʻlovchi tashishga moʻljallangan, 737 MAX oilasining eng sigʻimdor variantini aviakompaniyalarga yetkazib berish uchun yoʻl ochadi.
Yillar davomida kutilgan eng yirik Boeing 737 MAX’ga ruxsat berildi
Reuters xabariga koʻra, sertifikatlash jarayonining yakunlanishi Boeing uchun muhim bosqich bo‘ldi. Kompaniya 2020-yillar boshidan beri MAX 10ʼga sertifikat olishga urinib kelayotgan edi, biroq samolyotni bozorga chiqarish muddati bir necha bor kechiktirildi.
Boeing yangi modelni moliyaviy tiklanishidagi asosiy manbalardan biri sifatida ko‘rmoqda. Aviatsiya sohasiga ixtisoslashgan IBA tahliliy kompaniyasi maʼlumotlariga ko‘ra, aviakompaniyalar MAX 10 uchun 1550 dan ortiq buyurtma bergan. Ushbu model Boeing’ning 737 oilasi bo‘yicha hali bajarilmagan buyurtmalar portfelining 31 foizini tashkil etadi.
MAX 10 kompaniyaning tor fyuzelyajli yo‘lovchi samolyotlari bozorida Airbus bilan raqobatida ham muhim ahamiyatga ega. Sertifikatlashdagi kechikishlar davrida Yevropa ishlab chiqaruvchisining A321neo modeli yirik tor fyuzelyajli samolyotlar segmentida o‘z mavqeini mustahkamlab oldi.
Yangi laynerning asosiy buyurtmachilari orasida United Airlines, Alaska Airlines, Ryanair, Delta Air Lines va American Airlines bor. Ko‘proq yo‘lovchi tashish imkoniyati ushbu aviakompaniyalarning parkni rivojlantirish rejalari uchun muhim hisoblanadi.
Boeing allaqachon bir nechta MAX 10 samolyotini ishlab chiqib qo‘ygan. Ular buyurtmachilarga yetkazib berilishini kutmoqda.