Yevroparlamentda xavf ostidagi rossiyaliklarga shoshilinch viza berish taklif qilindi
Oʻldirilgan jurnalist Anna Politkovskayaning nabirasi Anna Viktoriya Politkovskaya Yevropa Ittifoqini Rossiyada taʼqib va zoʻravonlik xavfi ostida qolgan shaxslar uchun shoshilinch gumanitar vizalar mexanizmini yaratishga chaqirdi. Taklif jurnalistlar, faollar, talabalar va himoyaga muhtoj boshqa odamlarni qamrab oladi.
Yevroparlamentda xavf ostidagi rossiyaliklarga tezkor viza berish taklifi ilgari surildi
DW xabariga ko‘ra, Anna Viktoriya Politkovskaya 5-oktabr kuni Strasburgda buvisi xotirasiga bag‘ishlangan tadbirda yevroparlament deputatlariga murojaat qilgan. Ushbu uchrashuv Anna Politkovskaya o‘ldirilganining 20 yilligi munosabati bilan tashkil etilgan.
Uning aytishicha, Rossiyada xavfsiz qolish imkoniyati bo‘lmagan odam yordam so‘rab murojaat qilishi, qisqa muddatda javob olishi va xavfsiz joyga chiqib ketishi uchun amaliy yo‘l bo‘lishi kerak.
«Bunday inson o‘zining himoyaga muhtojligini hayoti evaziga isbotlashga majbur bo‘lmasligi kerak», - degan Politkovskaya.
U murojaati davomida Shimoliy Kavkazda ulg‘aygan yaqin do‘sti Sashaning taqdirini misol qilib keltirgan. Politkovskayaning so‘zlariga ko‘ra, Sasha oilasi va atrofidagilarning salbiy munosabatiga duch kelgan, 16 yoshida esa jinsiy zo‘ravonlikni boshdan kechirgan.
Sasha Rossiyada o‘zi uchun xavfsiz kelajak ko‘rmagan va mamlakatdan ketishni istagan. Biroq xorijda o‘qish uchun hujjatlar, mablag‘ va universitetga kirish imkoniyati kerak bo‘lgan. Himoya so‘rash uchun esa, avvalo, bunday yordam olish mumkin bo‘lgan mamlakatga yetib borishi lozim edi.
Politkovskayaning so‘zlariga ko‘ra, buvisi bir vaqtlar Sashaning otasi hayotini saqlab qolgan. Keyinchalik uning o‘g‘li yordamga muhtoj bo‘lganida, zarur ko‘makni ola olmagan. Sasha o‘z joniga qasd qilgan.
«Sizning yordamingiz bilan keyingi Sasha tirik qolishi mumkin», - deya murojaat qilgan u deputatlarga.
Tadbirda BMTning Rossiyadagi inson huquqlari bo‘yicha maxsus ma’ruzachisi Mariana Katsarova ham so‘zga chiqqan. Uning bahosicha, Anna Politkovskaya Checheniston haqidagi materiallarida yoritgan repressiyalar endilikda butun Rossiyaga tarqalgan.
Katsarova siyosiy sabablarga ko‘ra ta’qib qilish ommaviy tus olganini, qiynoqlar keng va tizimli qo‘llanayotganini aytgan. Uning ta’kidlashicha, xorijdagi hukumat tanqidchilari ham jinoyat ishlari, sirtdan chiqarilgan hukmlar, moliyaviy cheklovlar va Rossiya hokimiyati manfaatlarida harakat qiluvchi shaxslar orqali bosimga uchramoqda.
«Novaya gazeta Yevropa» bosh muharriri Kirill Martinov esa Yevropani Ukrainaga yordamni oshirishga chaqirgan. U Chechenistondagi urush bilan Rossiyaning Ukrainaga bosqini o‘rtasida bevosita bog‘liqlik borligini ta’kidlagan.