Yevropada o‘rmon yong‘inlari avj oldi: qurbonlar bor
Yevropaning bir qator mamlakatlarida kuchli issiq va qurg‘oqchilik fonida o‘rmon yong‘inlari davom etmoqda. 15–16-avgust kunlari Gretsiya va Ispaniyada yong‘inlar oqibatida uch kishi halok bo‘ldi. Yuzlab odamlar xavfli hududlardan evakuatsiya qilindi, o‘n minglab gektar o‘simlik maydoni yonib ketdi.
Yevropada o‘rmon yong‘inlari avj olib, qurbonlarga sabab bo‘lmoqda. AFP agentligining xabar berishicha, Afina yaqinidagi Salamin orolida ikki kishining jasadi sohil bo‘yidan topilgan. Ispaniyaning shimoliy Aragon mintaqasida esa yong‘inni o‘chirishda ishtirok etgan bir harbiy xizmatchi halok bo‘lgan.
Gretsiya sohil qo‘riqlash xizmati ma’lumotlariga ko‘ra, Salamin orolida deyarli bir vaqtning o‘zida ikkita o‘rmon yong‘ini boshlangan. Yong‘in o‘choqlari orolning janubiy va sharqiy qismlaridagi odamlar gavjum plyajlar yaqinida qayd etilgan. Vaziyat og‘irlashgach, sohil qo‘riqlash xizmati patrul katerlari va boshqa kemalar yordamida 570 dan ortiq kishini evakuatsiya qilgan.
Gretsiya yong‘in xizmati ma’lumotlariga ko‘ra, Salaminda keksa er-xotin yong‘in qurboni bo‘lgan. Qutqaruvchilar ularga o‘z vaqtida yordam bera olmagan. Kuchli shamol tufayli olov juda tez tarqalgan. Gretsiya televideniyesi yong‘in oqibatida butunlay yonib ketgan uylarni namoyish etgan. ANA agentligining xabar berishicha, kamida to‘qqiz kishi kuyish jarohatlari sababli tibbiy yordamga muhtoj bo‘lgan.
So‘nggi ma’lumotlarga ko‘ra, orol sharqidagi Seliniya plyaji atrofidagi yong‘in nazorat ostiga olingan. Janubdagi Peristeriya plyaji yaqinida esa alohida yong‘in o‘choqlari saqlanib qolgan. Olovga qarshi kurashga qariyb 200 nafar o‘t o‘chiruvchi, oltita samolyot va yettita vertolyot jalb qilingan. Salamin orolida taxminan 37 ming kishi istiqomat qiladi, ularning salmoqli qismini keksa yoshdagilar tashkil etadi. Gretsiya qutqaruv xizmati hisob-kitobiga ko‘ra, mamlakat bo‘ylab bir sutkaning o‘zida 34 ta yong‘in qayd etilgan.
Jazirama va uzoq davom etayotgan qurg‘oqchilik Ispaniyada ham o‘rmon yong‘inlarining kuchayishiga olib kelgan. 16-avgust kuni Fransiya bilan chegaradosh Aragon mintaqasi rahbari Xorxe Askon yong‘inga qarshi kurashda ishtirok etgan harbiy xizmatchilardan birining halok bo‘lganini ma’lum qildi. Mahalliy OAVga ko‘ra, harbiy bo‘lgan avtomobil ag‘darilib ketgan. Ispaniyaning boshqa bir mintaqasi – Andalusiyada esa yong‘in tufayli evakuatsiya qilingan yuzlab aholi o‘z uylariga qaytishga muvaffaq bo‘lgan. AFP ma’lumotlariga ko‘ra, so‘nggi o‘n kun ichida Andalusiyadagi yong‘inlar 25 ming gektar o‘simlik maydonini yo‘q qilgan. Qutqaruvchilar olovni faqat 16-avgustga kelib jilovlashga muvaffaq bo‘lgan.
Fransiyada ham yirik o‘rmon yong‘inlari kuzatildi. Biroq 16-avgustga kelib mamlakatning shimoli-sharqida, Belgiya bilan chegaradosh Ardenna departamentida hamda janubi-g‘arbiy hududlarda vaziyat barqarorlashgan. Bordo shahridan taxminan 100 kilometr janubda joylashgan hududda 13-avgustdan beri 1700 gektar o‘simlik maydoni yong‘indan zarar ko‘rgan. Iyul oyi oxirida Bordo yaqinida kuzatilgan yanada yirik yong‘in esa 40 ming gektar hududni qamrab olgan edi.
Belgiyaning Germaniya bilan chegarasida joylashgan mamlakatdagi eng yirik tabiiy qo‘riqxona – «Xoes Fenn» hududida ham yong‘inga qarshi kurash davom etmoqda. AFP ma’lumotiga ko‘ra, 16-avgust kuni chegara hududini qalin sarg‘ish tutun qoplagan va uni bir necha kilometr masofadan ham ko‘rish mumkin bo‘lgan. Belgiya rasmiylarining ma’lum qilishicha, atigi 24 soat ichida yong‘in maydoni ikki baravar kengayib, qariyb 3000 gektarga yetgan. 17-avgustga o‘tar kechasi yong‘in ko‘lami ortishi sabab Belgiya chegarasi yaqinidagi Germaniyaning Monshau shahrida ham ehtiyot choralari kuchaytirildi. Mahalliy hokimiyat shahar aholisining bir qismini evakuatsiya qilish to‘g‘risida qaror qabul qildi.