“Yevropa O‘zbekistonning 6 mingdan ziyod mahsulotiga nol stavkagacha boj imtiyozlari taqdim etmoqda” — “O‘zbekekspertiza” rahbari

“Oʻzbekekspertiza” rahbari maʼlumotiga koʻra, Yevropa Oʻzbekistonning 6 mingdan ortiq mahsulotiga nol stavkagacha boj imtiyozlari taqdim etmoqda.

“Oʻzbekekspertiza” AJ bosh direktori Umidjon Aʼzamxoʻjayevning taʼkidlashicha, Yevropa Oʻzbekistonning olti mingdan ziyod tovarlariga nol qiymatgacha boj imtiyozlari berib kelmoqda.

Tashkilot rasmiysining soʻzlariga koʻra, Oʻzbekistondagi 1600 dan ortiq korxona REX tizimida roʻyxatdan oʻtib, oʻz mahsulotlarini Yevropa bozorlariga imtiyozli bojlar asosida eksport qilmoqda. Bu savdolar “GSP+” dasturi doirasida amalga oshirilmoqda.

“Mamlakatimizga Yevropa Ittifoqi tomonidan “GSP+”, yaʼni maxsus savdo rejimining taqdim etilishi Oʻzbekistonning xalqaro maydonlarda yuqori eʼtirof etilishidan dalolat beradi. Biz respublikada ishlab chiqarilayotgan mahsulotlarga kelib chiqishi toʻgʻrisida sertifikat beramiz. Maxsus savdo rejimi doirasida mamlakatning olti mingdan ziyod tovarlariga nol qiymatigacha boj preferensiyalari taqdim etilmoqda”, — dedi tashkilot rahbari.

2025-yilda Oʻzbekiston Yevropaga 2,3 milliard dollarlik tovar va xizmatlar eksport qilgan. Joriy yilning birinchi yarmida bu koʻrsatkich 1,1 milliard dollardan oshdi. Mamlakat uchun “GSP+”dan foydalanish muddati 2027-yilning 31-dekabrigacha belgilangan.

“Oʻzbekekspertiza” aksiyadorlik jamiyati Oʻzbekistonda ishlab chiqariladigan tovarlarni sertifikatlash va ekspertizadan oʻtkazish bilan shugʻullanadi. Shuningdek, eksport qiluvchilarni Yevropa Ittifoqining REX tizimida roʻyxatdan oʻtkazadi.

“GSP+” dasturi — Yevropa Ittifoqi bozorlariga rivojlanayotgan mamlakatlardan kelayotgan qishloq xoʻjaligi mollari va boshqa ayrim mahsulotlar eksportiga berilgan imtiyozlardir. Dasturga aʼzo boʻlgan davlatga uch mingga yaqin tovarlarni bojsiz, 3200 turdagi mahsulotlarni esa pasaytirilgan stavkalarda eksport qilish imkoni beriladi. Oʻzbekiston 2021-yil aprel oyida “GSP+” dasturiga qabul qilingan. Shundan beri mamlakatga 6200 turdagi mahsulotlar eksporti uchun bojxona imtiyozlari taqdim etib kelinmoqda. Eksport tarkibidan toʻqimachilik, kimyo, qishloq xoʻjaligi va oziq-ovqat mahsulotlari oʻrin olgani maʼlum qilingan.

REX — “GSP+ dasturi” doirasida tovarlarning imtiyozli kelib chiqishini tasdiqlash maqsadida eksport qiluvchilarni roʻyxatdan oʻtkazish tizimi hisoblanadi. Jarayonda eksportchi ariza va oʻz tijorat faoliyati haqida maʼlumot taqdim etadi. REX tizimida roʻyxatdan oʻtish eksport rasmiyatchiligini soddalashtiradi, boj xarajatlarini kamaytirib, koʻproq daromad olish imkonini beradi.