Yer ostiga 8,3 kilometr: Xitoyda yangi oʻta chuqur quduq burgʻilandi
Xitoyda Taklamakon choʻlining shimoliy chekkasida chuqurligi 8 345 metrga yetgan quduqni burgʻilash yakunlandi. U Tarim havzasining chuqur qatlamlarida neft va gaz zaxiralarini izlash uchun moʻljallangan.
Yer ostiga 8,3 kilometr: Xitoyda yangi oʻta chuqur quduq qazildi
Chjantan-1 qudugʻi mamlakat shimoli-gʻarbidagi Shinjon-Uygʻur avtonom rayonining Vensu uyezdida joylashgan. Burgʻilash ishlari 2-oktabr kuni nihoyasiga yetkazilgan.
Bu Xitoyda toʻliq mahalliy ishlanmalar asosida yaratilgan va 12 ming metrgacha chuqurlikda ishlashga moʻljallangan burgʻilash qurilmasi yordamida qazilgan ikkinchi oʻta chuqur quduqdir.
Quduq orqali Tarim havzasining chuqur qatlamlarida neft va gaz toʻplanishi mumkin boʻlgan yirik geologik tuzilmalar oʻrganiladi. Tadqiqotlarning maqsadi — uglevodorod zaxiralarini oshirish uchun istiqbolli yangi hududlarni aniqlash.
Foydalanilgan burgʻilash qurilmasining poʻlat minorasi 82 metr balandlikka ega. U 6 ming ot kuchiga teng burgʻilash lebyodkasi — yuk koʻtarish mexanizmi bilan jihozlangan. Qurilmaning koʻtarish tizimi 900 tonnagacha yukni koʻtarishga qodir.
Intellektual boshqaruv tizimi esa burgʻilashning barcha bosqichlaridagi operatsiyalarni avtomatlashtirishga xizmat qiladi.
Mazkur uskunaning yaratilishi Xitoyga 10 ming metrdan ham chuqur quduqlarni burgʻilashda mahalliy texnologiyalardan foydalanish imkonini bergan. Yangi quduqning amaldagi chuqurligi 8 345 metr boʻlsa, qurilmaning loyihaviy imkoniyati 12 ming metrgacha yetadi.
Hozirga qadar Tarim neft konida chuqurligi 8 ming metrdan oshadigan 270 dan ziyod quduq burgʻilangan. Bu Xitoydagi shunday quduqlarning yarmidan koʻpini tashkil etadi.
2025-yilda mazkur hududda Shendike-1 qudugʻini burgʻilash ham yakunlangan edi. Uning chuqurligi 10 910 metrga yetgan.