Yarim yilda O‘zbekistonga xorijdan 9,3 mlrd dollar pul yuborildi

O‘zbekistonga joriy yilning dastlabki olti oyida xorijdan 9,3 milliard dollar miqdorida pul o‘tkazmalari kelib tushdi. Bu ko‘rsatkich 2026-yilning yanvar—iyun oylarida 13 foizga o‘sganini Markaziy bank axborot xizmati ma’lum qildi.

Pul o‘tkazmalari hajmining oshishiga chet eldagi mehnat muhojirlarining barqaror ish haqi va ayrim davlatlar valyutalarining qadri ko‘tarilishi sabab bo‘lgan. Shuningdek, o‘zbekistonliklar nafaqat an’anaviy yo‘nalishlarda, balki Yevropa va Osiyoning boshqa mamlakatlarida ham ishlash uchun ko‘proq safar qila boshlaganlar.

Pul jo‘natishda asosan telefon orqali, ya’ni kartadan kartaga (P2P) o‘tkazmalar ustunlik qilmoqda. Bunday onlayn o‘tkazmalar 32 foizga ko‘payib, 4,8 milliard dollarga yetgan. Bu O‘zbekistonga kelgan umumiy pul o‘tkazmalarining 51,7 foizini tashkil etadi. Shu bilan birga, O‘zbekistondan chet elga yuborilgan pullar ham 8 foizga oshib, 1,3 milliard dollarni tashkil etgan.

Valyuta oldi-sotdisida ham faollik kuzatilgan. Olti oy davomida aholi banklarga 12,3 milliard dollar sotgan bo‘lsa, banklardan 6,8 milliard dollar sotib olgan. Bu shuni ko‘rsatadiki, aholi dollar sotib olishdan ko‘ra, uni bankka sotishni afzal ko‘rgan, o‘rtadagi farq 5,5 milliard dollarni tashkil etadi.

Eslatib o‘tamiz, O‘zbekistonda banklardan pasportsiz 500 dollargacha naqd valyuta olish tartibi joriy etilgan edi. Avval bu chegara 100 dollarni tashkil qilgan.