Yaponiyaning «Trust Engineering Partners» kompaniyasi Oʻzbekistonda ipakchilik sohasidagi loyihani amalga oshirishni rejalashtirmoqda
Yaponiyaning «Trust Engineering Partners» kompaniyasi Fargʻona viloyatida ipak ishlab chiqarish loyihasini ishga tushirishni rejalashtirmoqda, taklif etilayotgan investitsiyalar ipakchilikni rivojlantirish va Oʻzbekistonning anʼanaviy ipakchilik tarmogʻini qayta tiklashga qaratilgan.
Yaponiyaning «Trust Engineering Partners» kompaniyasi Oʻzbekistonda ipakchilik loyihasini amalga oshirishni rejalashtirmoqda
Fargʻona viloyati hokimi Xayrullo Bozorov 8 oktyabr kuni ushbu kompaniya delegatsiyasi bilan uchrashdi, deb xabar berdi viloyat hokimligi.
Muzokaralarda Yaponiya tomonining ipak ishlab chiqarishni yoʻlga qoʻyish va sohadagi hamkorlikni kengaytirish boʻyicha takliflari muhokama markazida boʻldi.
«Trust Engineering Partners» vakillari Oʻzbekistonda, xususan, Fargʻona viloyatida oʻz faoliyatini boshlashdan manfaatdor ekanliklarini bildirishdi. Kompaniya ipakchilikni rivojlantirish va mamlakatning anʼanaviy ipakchilik tarmogʻini qayta tiklashga qaratilgan loyihani taklif qildi.
Tomonlar Fargʻona vodiysi asrlar davomida qadimiy Buyuk Ipak yoʻli chorrahasida joylashganini, bu yerda pillachilik va ipakchilik anʼanalari vaqt oʻtishi bilan rivojlanib borganini taʼkidladilar.
Hozirda Fargʻona viloyatida sohani rivojlantirish va yangi ishlab chiqarish quvvatlarini yaratish boʻyicha bir qancha loyihalar amalga oshirilmoqda.
Bozorov Fargʻonaning ipakchilik sohasidagi tajribasi va mavjud salohiyati yaponiyalik investorlarni jalb qilishi mumkinligini taʼkidlab, taklif etilayotgan loyihani viloyat tomonidan qoʻllab-quvvatlanishini vaʼda qildi.
Tomonlar, shuningdek, loyihani davlat-xususiy sheriklik asosida amalga oshirish imkoniyatlarini ham muhokama qildilar.
Uchrashuv yakunida viloyat salohiyatini baholashni davom ettirish, «yoʻl xaritasi»ni ishlab chiqish va loyihani bosqichma-bosqich amalga oshirish rejasini tuzishga kelishib olindi.