Yandex Maps Toshkent va Samarqand aeroportlari hamda savdo markazlarida binolar ichki navigatsiyasini yo‘lga qo‘ydi

Yandex Maps Toshkent va Samarqand aeroportlari hamda savdo markazlarida bino ichida navigatsiyani ishga tushirdi

Kuzgi turistik mavsum boshlanishi arafasida Yandex Maps’da ilk bor Toshkent va Samarqand aeroportlari hamda yirik savdo markazlari ichida yo‘nalish tuzish imkoniyati paydo bo‘ldi. Ushbu funksiya mahalliy aholi va sayyohlarga notanish binolarda tezroq yo‘l topishga, aeroportda kerakli geytni, savdo markazida esa kerakli do‘kon yoki restoranni oson aniqlashga yordam beradi. Marshrutlar binolarning qavatlari, o‘tish joylari, zinapoyalar, liftlar va eskalatorlar hisobga olingan holda tuziladi.

Kuz faslida sayyohlar oqimi oshib borayotgan bir paytda bunday imkoniyat ayniqsa dolzarb. Milliy statistika qo‘mitasi ma’lumotiga ko‘ra, 2026-yilning dastlabki yetti oyida O‘zbekistonga 7,75 million nafar sayyoh kelgan. Bu ko‘rsatkich o‘tgan yilning shu davriga nisbatan 22,6 foizga yuqori. Turistik oqimdagi o‘sish Yandex Maps’dan foydalanish statistikalarida ham aks etmoqda. Masalan, yoz oylarida Toshkent va Samarqand aeroportlari hamda savdo markazlari — sayyohlar marshrutidagi muhim nuqtalar — Yandex Maps’da o‘rtacha kuniga o‘tgan yilga qaraganda qariyb 40 foiz ko‘proq qidirilgan.

Toshkentda endi Islom Karimov nomidagi xalqaro aeroport, shuningdek, beshta mashhur savdo markazi: Tashkent City Mall, Samarkand Darvoza, Riviera Mall, Compass va Atlas Chimgan ichida marshrut tuzish mumkin.

Samarqandda esa foydalanuvchilar Samarqand xalqaro aeroporti, shuningdek, uchta yirik savdo markazi: Family Park, Makon Mall va M. Baraka ichida tezroq yo‘nalish topishlari mumkin.

Marshrut ko‘chadan boshlanib, bino ichida davom etishi ham mumkin. Masalan, foydalanuvchi yaqin avtobus bekatidan muayyan do‘kon yoki restorangacha yo‘lni tuza oladi. Yandex Maps binoning mos kirish joyini ko‘rsatadi va keyin savdo markazi ichida kerakli nuqtaga yo‘naltirib boradi. Shuningdek, xizmat eng yaqin lift yoki eskalatorni topishda, yoki avtoturargohga chiqish joyiga qaytishda ham yordam beradi.

Bino ichida marshrut tuzish uchun foydalanuvchi o‘z turgan qavatini tanlashi, joylashuvini aniqlashi va borish kerak bo‘lgan nuqtani ko‘rsatishi lozim. Manzilga bir nechta yo‘l orqali borish mumkin bo‘lsa, xizmat turli marshrut variantlarini taklif qiladi.

Aeroportlardagi navigatsiya yo‘lovchilarga terminal ichida tezroq yo‘l topish va kerakli geytni aniqlashda yordam beradi. Geytgacha marshrut tuzish uchun xaritadan kerakli geytni topish, nuqtani bosib turish va “Shu yerga” tugmasini tanlash kifoya.

Funksiyani ishga tushirish uchun binolarning qavatma-qavat sxemalari yangilandi, kirish joylari, o‘tish yo‘laklari, zinapoyalar, liftlar, eskalatorlar va boshqa obyektlarning joylashuvi aniqlashtirildi. Marshrut tuzish algoritmlari binolarning qavatlarini hisobga oladi va turli qavatlarda joylashgan nuqtalar o‘rtasida ham yo‘nalish tuzish imkonini beradi.

Kelgusida O‘zbekistonda bino ichida marshrut tuzish mumkin bo‘lgan obyektlar ro‘yxati kengaytiriladi.

Yandex Maps ilovasini Google Play yoki App Store’dan yuklab olish mumkin.

Yandex Maps — kundalik shahar hayotidagi turli vazifalarni hal qilishga yordam beradigan ilova. Unda eng yaqin kafe, do‘kon yoki dorixonani topishdan tortib, notanish hududga borishgacha bo‘lgan vazifalarni oson hal qilish mumkin. Ilovada kerakli tashkilotlar va shahar obyektlarini topish, ularning ish vaqti, fotosuratlari, reytinglari, sharhlari va boshqa foydali ma’lumotlarni ko‘rish, shuningdek, istalgan transport turida yoki piyoda qulay marshrut tuzish mumkin.