Yamayka Qirol Charlzga qullik uchun tovon toʻlash toʻgʻrisidagi petitsiyani taqdim etadi
Qiroldan uchta savolni Maxfiy kengashning Sud qoʻmitasiga havola qilish soʻraladi.
Yamayka Qirol Charlzga qullik uchun tovon toʻlash toʻgʻrisidagi petitsiyani taqdim etishga tayyorlanmoqda
Yamayka madaniyat vaziri Oliviya Granj Buyuk Britaniyaga boradigan delegatsiyaga rahbarlik qiladi.
Madaniyat vaziri Oliviya Granjning soʻzlariga koʻra, Yamayka hukumati dushanba kuni Qirol Charlzga qullik uchun tovon toʻlash masalasi boʻyicha petitsiya topshiradi.
Petitsiyada Yamayka davlat rahbari hisoblangan Qirolga mamlakatning oliy sudi boʻlmish Maxfiy kengashning Sud qoʻmitasiga Yamaykada afrikaliklarni qul qilishning qonuniyligi toʻgʻrisida uchta savolni yoʻllash soʻraladi.
Granjning aytishicha, bu «afrikalik ajdodlarimiz boshidan kechirgan yuzlab yillar davomidagi eng dahshatli zoʻravonliklar uchun anchadan beri hal etilmay kelayotgan tovon toʻlanishiga» yoʻl ochishi mumkin.
Shuningdek, u Britaniya muzeyi rasmiylari bilan uchrashib, mustamlakachilik davrida olib ketilgan osori-atiqalarni qaytarish masalasini muhokama qilishi rejalashtirilgan.
Yamayka hukumati Qiroldan Maxfiy kengashning Sud qoʻmitasiga yoʻllashini istayotgan uchta savol quyidagilardan iborat: Yamaykada afrikaliklarning qul qilinishi ingliz qonunchiligiga koʻra qonuniy boʻlganmi, bu xalqaro huquqni buzganmi va Buyuk Britaniya hozirda zararni qoplash boʻyicha huquqiy majburiyatga egami.
Petitsiya toʻlov talab qilish toʻgʻrisida emas.
Granj shunday dedi: «Bu savollarga javob olganimizdan yoki munosabat bildirilganidan keyin keyingi qadamlar belgilanadi».
Bukingem saroyi petitsiyaning tegishli tartibda topshirilishini taʼminlash uchun General-gubernator bilan yaqindan hamkorlik qilmoqda.
Saroy matbuot kotibi shunday dedi: «Uning Oliy hazratlari koʻp marotaba qullik muammosini chuqurroq tushunishga koʻmaklashish va bugungi jamiyatlar manfaati uchun tarixiy xatolarni tuzatish yoʻllarini topishga shaxsan va chin dildan sodiqligini bildirgan».
Qirol Charlz 2024 yilda Hamdoʻstlik yetakchilariga qilgan nutqida biz «saqlanib qolayotgan tengsizliklarni bartaraf etishning ijodiy yoʻllarini topishga» vaʼda berishimiz mumkinligini aytgan edi.
Granj shunday dedi: «2015 yilgacha Britaniya quldorlarga pul toʻlab kelgan, chunki biz mulk hisoblanganmiz.
Savol tugʻiladi: agar hozirgi zamonda ham biz quldorlarga odamlarimiz, ajdodlarimiz boʻlgan mulk uchun, qullik bekor qilingani sababli mulk uchun pul toʻlayotgan boʻlsak, unda nega biz ayni vaqtda biror bir chora koʻrilishini talab qilmasligimiz kerak?»
1833 yilda imperiyaning aksariyat hududlarida qullik bekor qilinganda, Britaniya hukumati quldorlarga tovon sifatida 20 million funt sterling toʻlagan. Bu mablagʻni yigʻish uchun olingan kreditlar 2015 yilda toʻliq uzilgan.
Granj, shuningdek, mustamlakachilik davrida Yamaykadan olib ketilgan «osori-atiqalarni repatriatsiya qilish boʻyicha muzokaralarni ilgari surish» uchun Britaniya muzeyi rasmiylari bilan uchrashadi.
U shunday dedi: «Ular bebahodir, ular Yamayka tarixi uchun muhim ahamiyatga ega va biz ularni uyga qaytarish ustida ishlayapmiz».
2015 yilda oʻsha paytdagi bosh vazir Devid Kemeron Yamaykaga tashrifi chogʻida Britaniyaning tarixiy qul savdosidagi roli uchun tovon toʻlanishini istisno qilgan edi.
Yamayka parlamenti deputatlari oldida soʻzlagan Kemeron qullik «barcha shakllarida jirkanch» ekanini aytgan. U «ushbu ogʻriqli merosni ortda qoldirib, kelajakni qurishda davom etishlariga» umid qilishini qoʻshimcha qilgan.