Yamalda yangi rekord va antiqa gol nishonlash, Qozogʻistonda magʻlubiyat
Millatlar ligasi guruh bosqichida 2-tur uchrashuvlari yakunlandi: Ispaniya magʻlubiyatsiz seriyasini 40 oʻyinga yetkazdi, Angliyada «Real» va «Barsa» futbolchilari gol uyushtirishdi.
Yamalda yangi rekord va noodatiy gol nishonlash, Qozogʻistonda magʻlubiyat
Ispaniya – Xorvatiya 4:1
Yamal, 2 (1:0). Bele, 28 (1:1). Pubil, 31 (2:1). Yamal, 63 (3:1). Uilyams, 89 (4:1)
Ispaniya Xorvatiyani 4:1 hisobida magʻlub etdi. Lamin Yamal mavsum boshida «Barsa»da qilgani kabi, milliy jamoada ham yorqin oʻyin namoyish etmoqda.
2-daqiqadayoq u «Atletiko» futbolchisi Aleks Baenadan toʻpni qabul qilib olib, oʻziga xos uslubda uzoq burchakka aniq zarba berdi. Yamal birinchi turda Angliya darvozasini ham 2-daqiqada ishgʻol qilgandi.
28-daqiqada xorvatlar kutilmaganda hisobni tenglashtirdi — mehmonlarning oʻyindagi ilk zarbasi darhol samara berdi. Keksalikni tan olmayotgan Ivan Perishich ketma-ket ikkinchi uchrashuvda golli uzatma muallifiga aylandi — Dion Bele uning pasini bosh bilan golga aylantirdi.
Oradan ko‘p o‘tmay, ispanlar yana oldinga chiqib olishdi: bu safar Yamal qanotidan ajoyib uzatma berdi, Mark Pubil esa bosh bilan to‘pni darvoza to‘riga joylashtirdi. Tanaffusdan keyin Lamin yana bir bor tabloga o‘z nomini yozdirib qo‘ydi: bu gal u yaqin burchakni aniq nishonga oldi. Golni esa noodatiy tarzda nishonlab, to‘p ustiga o‘tirib oldi. U bunday harakatni Chempionlar ligasida ham qilgandi.
19 yoshli bu vinger «Barselona»da mavsum startidagi sakkiz oʻyinda 8+6 natija qayd etgan. Terma jamoaning Millatlar ligasidagi ikki oʻyinida esa 3+1 ko‘rsatkichiga erishib, «Oltin toʻp» mukofotiga munosib ekanini yana bir bor isbotladi.
Oʻyinning soʻnggi daqiqalarida zaxiradan tushgan futbolchilar yakuniy hisobni oʻrnatishdi: Mikel Merino pas berdi, Niko Uilyams darvozabon bilan yakkama-yakka vaziyatga chiqib borib, uzoq burchakka aniq zarba berdi.